EDITORYAL - Pagrelibo sa mga hepe, leksiyon sa tanan

Girelibohan sa katungdanan ang direktor sa Lapu-Lapu City Police Office ug ingon man hepe sa Regional Investigation and Intelligence Division sa Police Regional Office-7 tungod sa pagkadiskubre sa laing law enforcement agencies sa gobiyerno sa usa ka  Philippine Offshore Gaming Operation diha sa Lapu-Lapu City sa miaging buwan.

Ang maong POGO, naa nag-operate sa sud sa Tourist Garden Hotel and Restaurant sa Barangay Agus sa maong dakbayan diin 169 ka mga langyaw nga Chinese, Malaysian, Indonesians ug Burmese ang nasakpang ilegal nga nagtrabaho sa maong POGO.  Ang POGO giingong gipanagiya sa usa sa mga Chinese nga nadakpan.

Kaning mga dinakpan gikatahong gikan pa sa Porac, Pampanga nga una nang gironda sa mga otoridad apan nakaikyas ug dinhi namalhin sa ilang operasyon sa Sugbu, partikular diha sa Lapu-Lapu City.

Ang unang natagakan sa atsa ug girelibohan mao ang hepe sa Marigondon Police Station tungod sa matud pa pagpabaya. Apan karon, ang mga hepe na sa LCPO ug sa RIID maaoy girelibohan tungod gihapon sa maong rason.

Ang lokal nga kapolisan adtong una sa wala pa madiskubrehi ang POGO sa maong hotel miduso og report ngadto sa ilang labaw nga wala silay namatikdang susamang operasyon dinhi.

Ilaha kining gipamahayag pipila ka adlaw human si Presidente Ferdinand Marcos Jr. hingpit nga nideklarar nga i-ban na ang tanang matang sa POGO dinhi sa nasud.

Kaning POGO magkinahanglan gyud og langyaw nga trabahante sama adtong mga nadakpan sa raid, kini tungod kay ang ilang mga kliyenteng manugal dili man mga Pilipino.

Gawas pa, dili lang online casino ang gipadagan aning mga POGO kay nasakpan nga nagpadagan sab sila og online scamming,  love scam ug uban pa nga ang sagad biktimahon mga kababayan ra sab sa mga langyaw nga nagtrabaho niini.

Dunay mga pagdudang gawas sa maong operasyon sa Lapu-Lapu City, adunay laing mga susama niini nga padayun nga nag-operate apan patagotago.

Ang pagrelibo kanila magsilbi untang leksyon sa ubang mga law enforcement agencies sa gobiyerno nga magtarong sa ilang pagpaniid.

Dako og matabang ang publiko aning bahina, apan tungod kay mahadlok sila sa ilang seguridad ug nagduhaduha sa kaligdong sa mga lokal nga polis, maong mas pilion sa mga tawo ang magpakahilom.