Pahimangno

(Ikatulong Bahin)

Mga praktikal nga sugyot aron sugdan ang pundok sa pagpangalagad alang sa kalingkawasan ug eksorsismo

Kinahanglan nga sa dili pa tukoron ang usa ka Deliverance Team mahuptan unta sa matag miyembro ang hustong pagsabot ingon man adunay pangako[14] nga  motuman sa ilang misyon uban ang kamanggihatagon ug kadasig.

Dugang pa, kinahanglan gyud nga dunay mangulo nga naghupot og usa ka hamtong nga kinaiya sanglit siya man ang maisip natong giya. Duol sa mga grupo nga dunay tataw nga estado ug adunay kasinatian ug kaalam kalabot ning maong pangalagad. Likayi ang mga pundok nga walay klaro ug dili kasaligan. Mga pundok nga walay tataw nga tumong ug paingnan.

1. Lantawon kining maong pangalagad alang sa kalingkawasan ingon usa ka Pastoral nga apostolado. Nga sa ato pa, pagahimoon diha sa konteksto sa simbahan ug gimbut-an ug gidasonan sa landong sa Simbahan. gikinahanglan nga ang pangulo maoy modumala sa mga sesyon ug pag-ampo. (kalakip niini ang eksorsista, Ministro sa Kalingkawasan, ug uban pang mga mahinungdanong sakop sa Deliverance Team.

2. Ang mga tagdumala kinahanglang dunay managsamang pagsabot[15] sa tahas nga nasangon. Kinahanglang sulbaron una ang walay pagsinabtanay kun unsaon pagsulbad ang kaso sa pasyente (leveling off) aron malikayan ang mga posibling komplikasyon kun wala ang panag-uyon.

3. Ang nagsugod pa lamang kinahanglan mangayo og tambag kanila nga dunay hataas nga kasinatian kalabot ning maong matang sa pangalagad.

4. Langay man tuod apan seguro. Gikinahanglan ang mapailubong pagkat-on ug paghamtong ning matang sa pagpangalagad. Dili kini lumba. Sa hinayhinay nga paagi apan seguro mas mabatonan sa matag sakop ang usa ka hamtong ug balanse nga pagsabot ning maong matang sa pangalagad. Mas masabtan ug kun masabtan, mas mahigugma ang matag sakop sa matang sa pangalagad nga ilang gisudlan nga mao ang pangalagad alang sa kalingkawasan ug eksorsismo.

5. Ayaw pugsa ang si bisan kinsa aron ampoan. Kinahanglan dunay dayag nga pagtugot gikan kaniya.

6. Ang mga tagdumala kinahanglang mopasayon sa matag sesyon ug pagtabang pastoral sa mga nanginahanglan sa paagi nga hapsay ug han-ay. Walay bisan kinsa nga dili sakop sa pundok ang tugotan nga mag-apil apil sa mga pag-ampo ug pagtabang gawas kun ang ang mga tagdumala nasayud ug nakaila ning mga tawhana.

Hinumdomi

1. Ang matag Deliverance Session pagahimoon sa usa ka dapit nga pribado ug gitagana alang ning maong pangalagad. Sama pananglit sa kapilya, oratorio ug atubangan sa Santisimo Sakramento.

2. Kinahanglan nga ang tagdumala maoy mobuot sa tukmang takna nga pagahimoon ang Deliverance Session human mahiagi ang pasyente kun biktima sa mga rekisitos sa dili pa pagahimoon ang mga sesyon o eksorsismo. (Padayonon)