Ang paglabay sa mga tinglong mga butang Unang bahin

Hinumdomi nga ang pamaagi sa paggamit sa mga sakramentales (sacramentals) sama sa agua bendita, medalyon ni San Benito, Krusipiho dili usa ka mahika. Ang gahum nila nagasukad sa imong pagtuo nga nigamit nila alang sa maligdong pag-ampo. Gibalaan sila sa Dios pinaagi sa mga pag-ampo sa simbahan. Dili malipay ang mga yawa kun anaa kining mga sagradong mga kahimanan.

Diha sa pagguba ug paglabay sa mga tinunglong mga butang, mahinungdanon kaayo kining mosunod nga mga lakang:

1. Pag-ampo sa Pag-ampo sa Pagsalikway kun Renouncement

2. Pagguba, pagbuak, pagbali, pagpulpog niini aron dili na kini mahibalik sa naandang bayhon niini. Kini aron matangtang sa hingpit ang bisan unsang nakatapot niini (attachment) nga tunglo.

3. Ang naguba o napulpog nga mga butang tinunglo kinahanglang ilubong sa yuta kun dili kini madugta (Non-Biodegradable) ang uban nga madugta kinahanglang sunogon ug ang abo isabyag ngadto sa nagdagan nga tubig (flowing water).

4. Sa dili pa ilabay o ilubong ang mga tinunglong butang kinahanglang mag-ampo ang natahasan sa paglabay sa mga tinunglong mga butang. Mahimong ampoon kini sa eksorsista o dili ba kaha sa ka layko. Iyang benditahan ang maong iglalabay nga mga tinunglong mga butang ginamit agua bendita. Mahimo usab nga wisikan og balaang lana.

5. Dili maayo nga isagol sa naandang basura ang mga iglalabay nga tinunglong mga butang. Kinahanglang ilahi kini og dapit kay nagtangag og risgo kining maong ritwal.

6.  Human malabay ang maong mga tinunglong mga butang pag-ampo sa prayer of cleansing ginamit ang Catholic Handbook ni Padre Jocis Syquia ug panghunaw  ginamit ang agua bendita.

PAG-AMPO

Benditahi ang mga tinunglong mga butang nga gub-on ug ilabay

Sa ngalan sa Amahan….

Sa Ngalan ni Jesus akong giputol ang mga baligtos ug gapus nga dili balaanon tali ni (Ngalan sa Biktima) ug ning maong butang nga gikan sa mga dautang mga tinubdan ug mga espiritu  (Balikon makatulo)

Ug gimandoan ko ang tanang mga dautang Espiritu nga nakatapot ning maong mga gapus ug baligtos nga moadto sa walay paglangan sa tiilan sa Krus ni Kristo! O Espiritu Santo sudli ang mga bakanteng luna nga gibiyaan sa mga dautang Espiritu ug hupnga sa imong presensiya, gugma ug panalipod si (Isulti ang Ngalan) ug ayaw tugoti nga mobalik pa ang mga dautang mga Espiritu nganhi kaniya! Amen.

pag-ampo batok sa mga butang tinunglo

Mahimong pari o eksorsista ang moampo niini. Sa laing bahin mahimo usab kining ampoon sa tagtungod kun dunay mga habak o laing mga tinunglong butang nga ilang ilabay, sunogon o ilubong. Kun minyo ang hingtungdan ampoon kini isip magtiayon. Kinuptan ang Krusipiho ni San Benito nga giatubang sa mga iglalabay nga mga tinunglong mga butang ampoon kining mosunod:

Amahan nga Anaa sa mga Langit nangamuyo kami kanimo nga imong gapuson ug hinginlan gikan Kanako/kanamo/sa among pamilya ug kanilang tanan nga nalambigit ning maong mga butang nga tinunglo, mga demonyo nga nakatapot niining mga butanga. Among bawion ang katungod nga gisakmit gikan kanamo sa mga dautan gumikan ning mga tinunglong mga butang nga ania sa among panimalay karon pinaagi sa Balaang Dugo ni Kristo Jesus! O Dios lig-ona kami sa imong panalipod ang among banay! Tabangi kami aron mas higugmaon ka namo! Among gipangayo nga maanaa ikaw sa mga tawo nga naghatag ning mga tinunglong mga butang ug palingkawasa sila gikan sa gapos ug kaulipnan! Tabangi sila aron ilang masabtan ang imong mga pamaagi ug panalangini sila. Kining tanan among gipangayo kanimo pinaagi sa pangama ni Maria Inahan sa Dios! kang San Pedro ug San Pablo, Kang San Miguel, Rafael ug Gabriel mga Arkanghel ug sa among mga Anghel nga Magbalantay! ug sa among Patron San (isulti ang ngalan sa Santos) ug sa gamhanang ngalan ni Jesus imong Anak (Manguros) kang kansang ngalan makapakurog sa impiyerno! Amen.

Pamaagi sa Paglubong sa mga tinunglong mga Butang:

1. Pagkawot og lungag.

2. Ilubong ang mga tinunglong mga butang.

3. Benditahi kini ug butangi kini og benditadong medalyon ni San Benito sa Nursia.

Pahinumdom:

Ang mga butang madugta nga mahimong sunogon, sunoga, ug isaliyab ang mga abo niini sa nagdagan nga tubig diha sa sapa ug uban pa.

4. Human nimo malubong ang mga butang nga tinunglo, panalangini ang imong kaugalingon ginamit ang Agua Bendita, pag-ampo og Amahan Namo, Tulo ka Maghimaya ka Maria ug panguros.

Pag-Ampo Aron Mabugto ang Bisan Unsang tunglo nga posibleng Motapot Human ilabay ang mga Tinunglong mga Butang.

Tugon: Kun magtiayon ang mag-ampo niini kinahanglang ampoon nila kini tagsa tagasa ug dili Dungan.

Sa ngalan ni Jesu-Kristo (manguros) linig-on sa pangama ni Santa Maria Birhen Inahan sa Dios ug ni San Jose, ug sa mga Balaang Arkanghel Miguel, Rafael ug Gabriel ug sa mga Apostoles Pedro ug Pablo, kang San Nicolas ug Sto. Domingo ug ni San Juan Maria Vianey ug sa akong mga Anghel nga Magbalantay ug sa tanang mga Santos sa langit ug sa gamhanan ug bililhong Ngalan ni Jesus, ako nangamuyo kanimo O Dios nga imong gun-obon ug hilison ang tanang tunglo, yamyam, mga silyo, panaad ngadto ni Satanas, kasabutan, espirituhanong kalambigitan sa mga dautan, dautang mga tinguha, mga lit-ag, bakak, panlimbong, tanang matang sa sakit, suliran gikan sa mga tinubdang yawan-on nga gipadala alang sa akong kaalautan. Amahan nga Langitnon hinginli ang mga dautang mga Espiritu nga kuyog niining mga tunglo batok Kanako ug ayaw itugot nga moepekto ug magdala og kadaut alang Kanako kining mga tungloha nga mamahimong babag sa akong pag-alagad kanimo ug sa pagsanong sa misyon nga imong gisangon alang sa imong kahimayaan.

Salamat Amahang Langitnon sa pagpatalinghug sa among mga pangamuyo. Gidayeg namo ang imong Balaang Ngalan, gisimba ug gihigugma ka namo. Salamat sa imong lamdag ug kahayag pinaagi sa Espiritu Santo. Salamat sa imong pagdasig Kanamo aron mamahimong masubsob sa pakigbatok sa mga dautan. Salamat sa paglaum sa mga higayon sa among kahuyang. Salamat sa kadaugan. Among gitugyan sa imong mga kamot ang among mga kaaway Amahan. Sud-onga sila uban ang imong Diosnong Kalooy ug dili ang ilang pagkamasalaypon. Si bisan kinsa nga nagtunglo kanamo among gipasaylo ug gipanalanginan. Si bisan kinsa nga nakasala ug nakapasakit kanamo among gipasaylo. Ug kanila nga naglutos kanamo amo karon silang giampo:

Amahan Namo.. Maghimaya ka Maria…

O Matam-is nga Jesus pasayloa kami sa among mga sala, luwasa kami sa kalayo sa impiyerno ug dad-a ang tanang kalag ngadto sa langit ilabina kadtong nagkinahanglan kaayo sa imong kalooy ug panabang.

San Miguel Arkanghel, panalipdi kami sa Gubat. Mahimo kang taming batok  sa mga dautan ug sa tanang lit-ag sa yawa. Gapuson unta siya sa Ginoo nangamuyo kami O Prinsipe sa mga Langitnong Hugpong, itambog sa Impiyerno si Satanas ug ang tanang Dautang Espiritu nga naglibot libot sa yuta nangita sa kapildihan sa kalag. Amen.

Maghari unta si Kristo sa among kasingkasing, sa among kabanayan, ug sa tanang dapit sa kalibutan, hangtud sa kahangturan. Amen.

Padayonon sunod gula