Nag-apura sa birthday
Seryoso ang depekto sa mga haligi sa Cebu City Medical Center (CCMC) para sa kontraktor nga gitahasan pagtiwas sa building. Mao nga nagdumili siya sa pagtukod sa ika-walo, ika-siyam ug ika-napulo nga andana hangtod nga makaseguro sa kaluwas sa kinatibuk-an nga istruktura.
Si Michael Sicat, tag-iya sa M.E. Sicat Construction, nitug-an ni suspended Cebu City Mayor Mike Rama atol sa inspeksiyon sa CCMC niadtong Hulyo 27, 2022 sa problema nga iyang nakit-an sa trabaho sa tulo ka nag-unang kontraktor: Wa magtungod ang mga haligi sa ubos nga mga andana.
* * *
Tungod sa maong kasayuran, gibakwi ni Rama ang iyang pasalig nga mahuman ang pagtukod sa tanang 10 ka andana sa CCMC sa Oktubre 28, 2022 tungod sa iyang giisip nga labing importanteng okasyon, ang iyang ika-68 nga birthday.
Pero wa ning kapugong niya pagbuut-buot na sab og pahamtang sa dugang duha ka ultimatum: Disyembre 2023; ug dihang wa matuman, Pebrero 2024. Sa pagtimaan sa ika-70 niyang birthday karong tuiga, duha ka butang ang peligrong di mahitabo: Una, ang pagkahuman sa CCMC; ug ikaduha, ang pagbalik niya sa City Hall.
* * *
Timaan unsa ka-apurado sa paghuman sa CCMC, naabtan ang upisina ni Rama og dul-an sa tuig una nakatapok sa mga eksperto aron pagsusi sa gikabalak-an nga nag-ambihas nga mga haligi. Ang inspeksiyon sa Pebrero ug Marso 2023 nga gipangulohan ni Engr. Pericles Dakay nimatuod nga may sukaranan ang kabalaka ni Sicat Hulyo 2022: Hagbong sa material testing ang duha ka beams ug columns. Nirekomendar si Dakay og laktod nga sulbad: Puston og epoxy ang depektusong mga haligi.
* * *
Tungod sa pagdali-dali ni Rama, way nagsusi nganong nalutsan ang CCMC sa seryusong mga depekto. Mangahas mi og sugyot nga patubagon ang Special Project Management Team sa CCMC nga gitukod ni Rama sa 2015. Nga naglakip nilang Engr. Jose Marie Poblete, Engr. Joseph Abellar, Engr. Dario Caballero, Archt. Eleazar Lipang, Engr. Nilo Igot, Engr. Meyrick Ricardo Balaga, Engr. Unison Rom Sotto ug Engr. Edwin Apalla.
Hinaot nga gituman ni Rama sa wa pa masuspenso ang laing rekomendasyon ni Dakay: Pagtukod og tarung nga project management team aron mas hapsay ang pagtiwas sa CCMC. Bahalag kang kinsang birthday matunong.
* * *
- Latest
