EDITORYAL - Panalipdi ang no-build zones

Usa sa nahimong problema sa mga malambuon ug dagkong siyudad ang problema sa baha, kaluwasan sa mga molupyo, ug ang grabeng traffic tungod sa nagkagagmay nilang mga karsada.

Sa mga pagbaha kasagarang hinungdan mao ang mga basurang bisan asa lang gitambak sa mga tawo gikan sa mga residential areas ug ang mga biya ug mga plastic nga bitbit sa mga tawo nga maglakaw sa karsada.

Ang problema sa basura sa residential areas masulbad lang kun adunay piniling lugar nga mao lang gyuy tambakan ug sa hustong oras, samtang kining mga tawong magpataka og labay og basura masanta lang kun duna gyuy aktibong manakop ug mopamulta ug modisiplina.

Gawas pa, kining mga ilegal nga estrakturang gipangtukod sa mga kilid sa sapa nga nakalapas na sa 3-meter easement zone usa sa hinungdan aning pagbara sa sapa tungod sa mga basura gihapon.

Gibutang sab nila sa peligro ilang kinabuhi tungod niini ug sila sa ang usa sa hinungdan nganong molapaw ang tubig.

Kining mga ilegal nga estraktura kilid sa mga karsada ug nagtungtong na sa mga aseras usa sa hinungdan sa paggamay sa gilapdon sa karsada ug makaingon sa problema sa trapiko.

Nakatampo sab sila sa pagbaha kay ang ilang gibutangan sa ilang mga tindahan, tinda-tindang mga lamesa ug ubang mga butang naa man nagpatong sa mga kanal nga nabuni na sa lapok, yuta ug ilang mga basura.

Maayo unta og kuhaan og pagtulon-an sa mga nagtubo pa nga mga LGUs -kining sitwasyon sa mga highly-developed cities. Mentras dili pa tantong naghuot ilang mga sapa ug mga karsada, mas maayong planohon na nilang daan ang tanan  ilabi na sa mga dapit nga dili na mapugngan ang paglambo sama sa mga sentro sa ilang lungsod o población.

Husto kining gibuhat ni Gobernador Gwendolyn Garcia nga dili pahatagan og building permits kining mga estrakturang buot tukoron nga naa sa sud sa mga no-build zones o easement zones.

Kay kun pasagdan ang usa, mosuon sab ang uban ug mga kasikbit nga mga nanag-iya og luna hangtud dako na hinuong problema tungod kay magpabayad naman ni sila unya kun demolison ang ilang gipangtukod.