Sakripisyo sa lider

Usa sa labing awahing mga tinudlo ni Presidente Ferdinand Marcos, Jr. mao ang kapitan sa Barangay Kalunasan nga si Litoy Ceniza.

Siya gitudlo isip assistant secretary sa National Anti-Poverty Commission (NAPC).

Apan way plano Ceniza nga dawaton ang pwesto bisan iyang giangkong gipaabot na niya ning daan isip maoy bise presidente sa Partido Federal ng Pilipinas (PFP) dinhi sa Visayas. Ang PFP maoy partido sa president.

Daghan ang konsiderasyon ni Ceniza sa iyang hukom pagbalibad sa pwesto nga gihatag sa Malakanyang niya. Ug ang labing bug-at sa tanang konsiderasyon mao ang mga tawo nga iyang kauban sa kampanya ug maoy naghimo niyang kapitan sa Barangay Kalunasan.

Giangkon ni Ceniza nga nahingawa siya sa mahimong dangatan sa iyang mga dumadapig nga karon nag-alagad isip mga kawani sa barangay kun mobiya siya isip kapitan aron dawaton ang pwesto isip ASEC sa NAPC.

Sigurado siyang tangtangon ang tanan niyang mga tinudlo sa mohulip unya niya nga kapitan sanglit ang numero uno nga konsehal nga si Boyet Ocampo dili man niya kauban sa grupo sa miaging eleksiyon. Kun wala pa malangan ang iyang appointment ug niabot sa wala pa ang barangay election, sayon unta alang ni Ceniza ang pagdawat sa pwesto.

Bisan kuwang ko og pagtuo nga manaktak si Ocampo kun makalingkod kini isip kapitan, apan uyon ko sa nahimong hukom ni Ceniza nga magpabilin isip kapitan ug padayong alagaran ang iyang barangay.

Dili husto alang sa usa ka pinili nga opisyal nga talikdan ang iyang responsibilidad alang sa personal nga dungog ug kabulahanan.

Gipili ka sa katawhan nga maoy ilang lider sa piho nga termino busa gipaabot sab sa taga Kalunasan ang imong serbisyo sulod sa maong termino.

Mao nga saludo ko niining sakripisyong gihimo ni Ceniza tungod ug alang sa iyang mga sakop. Kini maoy kalidad sa usa ka tinuod nga lider!