EDITORYAL - Duna pay daghang Alice Guo

Nasakpan na gyud ang tinuoray nga pagkatawo ni suspended Bamban mayor Alice Leal Guo human sa makuting imbestigasyon nga gihimo sa National Bureau of Investigation sa iyang pagkatawo.

Nasuta nga dili tinuod nga siya Pilipino kondili usa ka Chinese national nga dunay pangalang Guo Hua Ping ug dunay mga pagduda nga pinadala siya sa China aron mangespiya dinhi ug sa sud mismo sa gobiyerno sa Pilipinas.

Kahibulongan kaayo kun nga nakadaog siya sa nakalabay nga piniliay isip mayor sa lungsod sa Bamban, Tarlac  niadtong tuig 2022.

Nakabaton siya og Philippine Statistics Administration Birth Certificate ug gituohan nga mao iyang gigamit niya sa mga transaksyon ug pagproseso og mga lehitimong dokumento dinhi sa Pilipinas sama sa mga purong-dugong Pilipino.

Pinaagi aning mga dokumentoha ug pag-insister pagbarog atubangan sa Senate inquiry nga siya tinuoray nga Pilipino, nga siya anak og Filipina nga katabang sa iyang amahan nga maoy Chinese national ug daghan pang uban nga sa kadugayan pulos tanan nasakpang mga bakak, nagpakita lang og mga skills ug hiyas nga naa sagad makita lang sa usa ka propesyonal nga espiya.

Mao nga kinahanglang utingkayon og maayo sa mga otoridad unsa kalawom ang gaway o ugat nga naabot na sa pangespiya sa China sa sud mismo sa gobiyerno sa Pilipinas sukad niadtong tuig 2016 hangtud karon.

Dili na angay ikahibulong pa nga adunay mga kaparehas niya nga nisulod dinhi sa Pilipinas tungod kini sa tensiyon diha karon sa West Philippine Sea.

Ug nakabuwelo sila pagbuhat niini dihang sama og giablihan sa Pilipinas ang pultahan niini sa tanang Chinese nationals nga gusto kunohay mobubo diri og puhonan sa panahon sa administrasyong Duterte nga nakigsuod ngadto sa ilang gobiyerno.

Ang estorya bahin niining Guo angay ikaalarma sa tanang Pilipino. Dili lang kini suliran sa mga naa sa otoridad o mga naa sa gobiyerno, suliran kini sa tanan gikan sa mga adunahan ngadto na sa pinaka-kabus nga Pilipino tungod kay naglambigit na kini sa seguridad ug hulga kini sa tibuok Pilipinas.

Pila pa man kaha ka mga “Alice Guo” nga mga Chinese nationals nga nagdala karon og pangalang Pilipino ang naglihok karon dinhi sa nasud nga hinay-hinay nagpagabok ug nagpahuyang sa panaghiusa sa mga Pilipino?