EDITORYAL - Bata for sale

Dako na gyud kaayo og kausaban karon ang kalibutan, bisan gani ang Pilipinas kansang mga pamilyang Pilipino nabantog na sa kalibotan nga suod kaayo ang tanang miyembro, ebidensiya niini kining mga extended families, o mga pamilya nga mag-usa ra og balay nga gipuy-an.

Pagpakita lang kini kun unsa kabililhon sa kultura ug tradisyong Pilipino ang pamilya o banay. Mao nga daghan sa mga langyaw ang masuya kay wala kini sa ilaha.

Dinhi ang katiguwangan amumahon hangtud sa oras sa ilang kamatayon, butang nga wala didto sa ubang nasud.

Apan ning bag-o, dunay namonitor ang Department of Social Welfare and Development-National Authority on Child Care (DSWD-NACC) nga pagpamaligya og mga bata pinaagi sa online partikular diha sa Facebook.

Duna matud pa 20 ngadto sa 30 ka Facebook accounts ang na-monitor nga nagbaligya ug mopalit og mga bata.Gani ang uban sa nagbaligya, mga mismong ginikanan sa maong mga bata.

Naunsa naman ni karon ang kalibotan, labaw ng makapangutana ang tanan naunsa naman ang kulturang Pilipino? Dili rason ang kapobrehon kay kaniadto pa daghan ng mga Pilipinong pobre apan walay nakaako pagbaligya sa ilang mga anak.

Lahi ra kun biyaan o abandonahon ang mga anak kun itandi aning ibaligya ngadto sa laing tawo. Kay sa pag-abandonar, mahimo man kining sagupon sa kabanay sa mga ginikanan; apan kun ibaligya gani, mura nalang og produkto ang ilang mga anak.

Kun naglisod og atiman o suporta, naa may gobiyerno nga makatabang bisan gamay sama anang Pantawid Pamilyang Pilipino Program, naay mga livelihood programs, naay cash for work programs ang gobiyerno ug daghan pang pamaagi.

Kun ang ginikanan gani gusto gyud ug tinuoray nga nagmahal sa ilang mga anak, buhaton gyud niini ang tanan aron sila masuportahan nungka biyaan o ipanghatag ug labaw na kun kini ilang ibaligya.

Kaning mga ginikanan nga makaako og baligya sa ilang kaugalingong dugo ug unod, dili na kini tungod sa kapobrehon, kondili, tungod ni sa kahangol sa kwarta.