Pergalan talamak sa mga pistang bayan
PANAHON ngayon ng kapistahan sa maraming bayan sa bansa kaya nagkalat na naman ang mga peryahan at sugalan (pergalan) na ang mga parukyano ay mga kabataan. Nauubos ang mga baon ng mga bata sa pagtaya sa mga pergalan. Maraming bata ang nahuhumaling sa pergalan at ito ay lingid sa kanilang mga magulang. Walang kamalay-malay ang mga magulang na ang binibigay nilang baon ay nauubos lang sa pagtaya sa mga pergalan.
Kaya tama lang ang aksiyon ng Department of Education (DepEd) na suspendihin ang klase sa pampublikong eskuwelahan. Sa totoo lang, ang pagsuspende sa klase sa public school ay upang maiiwas ang mga kabataan sa mainit na panahon. Kaya nakabuti dahil nakaiwas sa super init at pergalan ang mga estudyante.
Dapat kumilos si Vice President at DepEd Secretary Sara Duterte para atasan ang PNP na hulihin ang mga financiers ng peryahan na nag-o-operate sa pergalan. Kung walang kumpas mula kay Sara, bulag at bingi ang mga mga pulis.
Dito sa Capiz, malaki ang hinala ko na may permiso mula sa LGUs ang mga operator ng peryahan kaya malayang nakapaglalatag ng pergalan. Kaya naman nabibigyan ng permiso ang mga operator ng peryahan ay sa dahilang ang nakasaad sa kanilang permit ay walang pasugal na magaganap. Kapag nailatag na, dito na lulutang ang pasugal na pula o puti o color games. Madaling maingganyo ang mga kabataan sa color games.
Ipinagtataka ko lang, bakit hindi sinisita o hinuhuli ng mga pulis ang pergalan lalo na sa Western Visayas. Alam naman ng mga pulis na bawal ang pasugal sa peryahan sapagkat mga kabataan ang kadalasang dumarayo kapag may pista. Magkano kaya ang lagay?
- Latest
