EDITORYAL - Ipagpatuloy ang patrulya sa West Philippine Sea
Huwag titigil ang Philippine Coast Guard (PCG)sa pagpapatrulya sa West Philippine Sea. Ipakita sa China na hindi basta-basta matitinag, gaano man kalakas ang tubig na pakakawalan nila. Ipakitang hindi susuko gaano man karami ang humaharang na China Coast Guard (CCG) at Chinese militia. Hindi masisindak kahit mabasag man ang bahagi ng barko.
Noong Lunes, nakaranas na naman ng panibagong pangha-harass ang barko ng PCG at ang barko ng Bureau of Fisheries and Aquatic Resources (BFAR). Walong beses binugahan ng “nakakamamatay” na tubig ang BRP Bagacay ng PCG at saka binangga. Binugahan din ng tubig ang BRP Datu Bankaw ng BFAR at saka binangga.
Sa lakas ng pagbangga sa BRP Bankaw, nabasag ang salamin sa unahan ng barko. Tinamaan din ng pambobomba ang communication at navigation systems ng mga naturang barko.
Sa kabila naman ng mga pangyayari, sinabi ni PCG na wala umanong planong gumanti sa China, sa kabila nang “very fatal” ang pangyayari. Magdadala ng supply sa Scarborough Shoal ang dalawang barko nang maganap ang insidente.
Ayon kay PCG spokesperson Commodore Jay Tarriela, tatalima sila sa payo ni President Ferdinand Marcos Jr. na manatiling propesyunal at hindi gaganti sa CCG sa ginagawang pambobomba ng tubig.
Hanggang kailan magsasawalang-kibo sa ginagawa ng China sa mga barko ng Pilipinas. Masyado nang agresibo ang CCG at ang Chinese militia. Kapag namataan nilang paparating ang barko ng Pinas na may lamang suplay, nagkukumpulan silang animo’y pukyutan. At saka bubugahan ng tubig na maaaring ikamatay nang sinumang tatamaan nito. Malaki ang pinsala ng BRP Datu Bankaw at pati umano ang bandila ng Pilipinas ay nabasa at nasira dahil sa malakas na pressure ng tubig. Maghain ng protesta sa ginawang ito ng CCG na paglapastangan sa bandila ng Pilipinas.
Walang balak ang PCG na gumanti pero mariing sinabi ni Tarriela na lalo pa nilang paiigtingin ang pagpapatrulya sa WPS. Ayon pa kay Tarriela, hindi sila mapipigilan ng China at patuloy silang magpapatrulya sa naturang lugar at mamimigay ng ayuda sa mga mangingisda, kasabay nang paninindigan na ang WPS ay pagmamay-ari ng Pilipinas.
Tama ang gagawin ng PCG, ipagpatuloy ang pagpapatrulya, huwag matakot at ipaglaban ang teritoryo sa WPS. Hindi dapat patinag sa kalaban.
- Latest
