Sala sa nagmotorsiklo, nag-awto-SUV napurihisyo

Ang disgrasiya sa mga nagmotorsiklo halos kada adlaw, nagpruweba lamang nga ang kabadlungon sa mga two-wheel drivers, dili na mabangbang. Ambot, gagmay ra man unta kining mga sakyanana, walay atop, walay bungbong ug maslayid kun makaligis rag panit sa saging, apan inay mag-amping, mosunod sa tukmang lagda sa trapiko, mao hinuoy numero unong supakero.

Ako mismo, biktima usab niining mga kaskasero nga nagmotorsiklo, kinsa nagtuo nga maoy ‘Hari sa Kadalanan.’ Tuig 1995, gihatagan ko sa Ginoo og first brand new car, Mitsubishi Lancer, Satin red, sa akong kinabuhi.

Wala pay duha ka bulan, gibanggaan na sa nagmotorsiklong mag-uyabay: drayber ug ang angkas. Pero dakong milagro. Dali ra silang nakabangon ug igo rang namapha sa ilang tuhod bisan pa sa gidangatang pagkahiwi sa manobela sa ilang motorsiklo ug sa grabing pagkaguba sa atubangang bahin sa akong sakyanan.

Natabla tuod ang maong kaso, kay sa imbestigasiyon migawas nga sila maoy sad-an. Apan purihisyo gihapon kaayo. Tinuoray, nagamit nako akong comprehensive insurance, pero may P2K kong participation fee.

Unya, ang tulo ka semana sa pagpaabot, ayha pa maayo ang sakyanan. Pastilan, pagkapurihisyo gayod kun hibanggaan kag motorsiklo!

Sa social media, may netizen sab mipaambit sa iyang kasinatian. Ilang pamilya pa kunoy sakay sa SUV ang gibanggaan sa nagmotorsiklong danghag, kinsa bisag kurbadahon kusog kaayong mipadagan. Ug didto na mosubay-kawat sa pikas lane tumong nila.

Naospital ang nagmotrsiklo. Pamilya sa SUV ang nakagasto sa ospital. Unya, bisag may clearance na sa doktor nga mahimo nang makagawas ang pasyente, ang pamilya sa nagmotorsiklo, gusto pa patas-an ang ilang pag-estar sa tambalanan. Kay gawas nga aircondition room libre pa sa pagkaon. Haskang abusadoha!

Ang kadtong nahitabong aksidente duol sa CSRP viaduct, diin ang nagmotorsiklong may angkas babaye, nadasmag sa konkreto-mubong road barrier ug nanglupad-tugpa sa pikas lane, diin ang SUV nga wala nay kalikayan maoy nakaligis-patay.

 Pero bisag klaro kaayo nga ang nagmotorsiklo maoy sad-an, napurihisyo-nakagasto gihapon ang SUV driver.

Unya, LTO ug CCTO patas pa kaha kining situwasiyona sa nanag-amping nga four-wheel drivers batok sa abusadong nagmotorsiklo? Lalim bay, sala sa nagmotorsiklo, unya nag-awto-SUV drivers pay napurihisyo? Unta, mahatagan kinig dakong luna sa inyong kasingkasing, mga Tsip!