Habal-habal

Panahon na ba nga ihunong sa Department of Transportation (DOTr) ang nagpadayon niining pilot study tugotan ba sa hingpit isip kabahin sa public transport system sa nasud ang habal-habal human sa dugoon nga aksidente niadtong miaging Miyerkules, April 10, nga mikalas sa kinabuhi sa Move It rider ug sa iyang pasahero?

Di ikalimod nga labihan ka risgo ang pagsakay og habal-habal labi pa diha sa mga national highway diin ang mga nagmaneho og motorsiklo makig-ilog sa dagko nga mga sakyanan.

Ang uban sa mga driver magpataka pa og overtake sa way pagpanagana sa siguridad sa ilang kaugalingon ug sa ilang mga pasahero.

Apan sa pikas bahin, di sab malilong ang dakong natampo sa presensiya sa habal-habal aron maminusan ang unemployment sa nasud.

Sigun sa datus sa gobiyerno, ang pilot study sa mototaxi o ang mas nailing habal-habal nakatampo ni og 1.1 porsiento pagkunhod sa unemployment rate sa nasud sukad niadtong 2019 hangtud sa 2021.

Sa miaging tuig miabot na sa kapin sa 100 mil ka mga trabaho ang namugna tungod sa motorcycle-hailing app tungod kay daghan sa mga dunay motorsiklo nahimo na nga mga mototaxi pinaagi sa mga kompaniya nga gitugotan sa DOTr nga makasalmot sa pilot study sama sa Move It, Angkas, Joy Ride ug Grab.

Apan igo na ba ni nga rason aron isugal sa atong gobyerno ang siguridad sa publiko? Ang nahitabo sa Move It rider nga si Brian James Liva Pedrosa Bayarcal ug sa pasahero niyang si Chlea Jane Gomez niadtong miaging Miyerkules angayang magsilbing pamukaw sa mga hingtungdang opisyal sa gobyerno aron hinuktukan pag-ayo ang isyu.

Kun di man gyud mahimong idili sa hingpit ang habal-habal, angayan tingali nga sigurohon sa gobiyerno ang kaluwasan sa mga sumasakay.

Usa sa mga angayang buhaton aron masiguro ang kaluwasan sa mga mosakay og habal-habal mao nga siguroon sa gobyerno nga dili mga substandard ang protective gear nga gigamit sama sa helmet.

Angayan sab nga hugot nga idili sa mga habal-habal nga mosulod sa mga national highway ug makig-ilog sa dagko nga mga sakyanan.

 Kun di man gyud malikayan, angayang istriktong ipatuman sa gobyerno ang motorcycle lane diin adto ra mahimong moagi ang mga habal-habal ug siguroon nga dunay speed limit.