Katilingban ni San Miguel Arkanghel

Kun buligan sa grasya sa Dios mamahimong maumol kining maong katilingban nga makatabang dako uyamot sa panginahanglan sa kadaghanan.

Sukaranang Teksto (1 Pedro 5;8-9)

“Pagmaigmat ug pagmibinantayon kamo kay ang inyong kaaway nga mao ang yawa naglibot libot kaniyo sama sa liyon nagngulob nangita ug tukbonon, Lig-ona ang inyong pagtuo ug sukli siya kay nasayud kamo nga ang inyong isigkamagtutuo sa tibuok kalibutan ang gisulayan usab sa samang alantuson.”

Ang sugilanon sa maong katilingban

Nagsugod kini mga usa ka tuig na ang nilabay sa dihang namugna ang pangalagad alang sa pag-ampo alang sa kalingkawasan ug eksorsismo sa southwest district sa Artsiyosesis sa Sugbo. Gilangkoban kini sa pari nga kasamtangang gidestino ingon nga usa sa mga eksorsista sa Sugbo. Kuyog niya ang mga layko gikan sa Mantalongon Barili, hangtud na sa Bato, Samboan. Kasamtangang Sentro sa Kalihukan mao man ang Parokya ni San Jose Madridejos, Alegria, Sugbo. Magtigum sila matag adlaw nga Sabado alagn sa Santos nga Misa, hilog, kumpisal ug pagpanudlo ingon man ang pagbendisyon sa mga gamitonon nga mga sacramentals. Sa laing bahin, sila pud ang motabang kanila nga nahimong nabiktima sa espirituhanong kaaway nga mao ang yawa.

Motto: Bisan Asa Anaa ang Dios (Deus Ubique Est)

Misyon

1. Ang pagpakaylap sa debosyon kang San Miguel Arkanghel lakip na ang katekesis.

2. Ang pagtudlo sa mga matag banay sa batakang sukaranan sa Espirituhanong Pakiggubat kun Spiritual Warfare.

3. Ang pagsumpo sa mga patuo tuo ug uban pang mga occult nga balansayon pinaagi sa pagpanudlo ug pagduaw sa matag banay.

4. Pagdasig sa matag panimalay nga modangop sa mga sakramento sa simbahan

5. Pagdasig sa matag banay nga mosimba ug manginlabot sa Parokya.

6. Pagpanalipod sa usag-usa gikan sa yawan-ong pagbanhig pinaagi sa pag-inampoay ug pagdinasigay.

7. Pagtudlo sa mga sakop sa hustong paggamit ug pagsabot sa mga sacramental nga gamiton diha sa espirituhanong pakiggubat kun spiritual warfare.

Mga apostolado kun pangalagad

1. St. Michael the Archangel Ministry

Kini usab ang evangelization arm kansang tumong mao ang pagpakaylap sa debosyon ni San Miguel Arkanghel ngadto sa mga panimalay ug mga tunghaan pinaagi sa mga home visits ug school visits. Ilang ampoon ang chaplet ni San Miguel Arkanghel. Ug ila pud nga katungdanan ang pagtudlo sa mga tawo nga kinahanglan biyaan ang patuo tuo ingon mana ng mga habak.

2. St. Raphael the Archangel Ministry

Ilang apostolado ang pagduaw sa mga masakiton ingon man ang pagtudlo sa mga masakiton sa bili sa sakramento sa hilog ug kumpisal. Ilang trabaho ang pagkontak sa pari aron mahilogan o mapakumpisal ang mga masakiton ug kun makita nga problema nga spiritual ang hinungdan, sila usab ang mosugyot kun mo recommend nga gikinahanglan ang deliverance o dili ba kaha exorcism.

3. St. Gabriel the Archangel Ministry

Katungdanan ug lihok nini ang pagsangyaw ug pagpakaylap sa mga mahinungdanong impormasyon kalabot sa exorcism and deliverance ginamit ang social media ug uban pang mga media platforms.

4. Guardian Angel Ministry

Lihok niini ang pagtudlo ug pag-umol sa mga kabataan sa mga sukaranan kun batakang pagtulon-an sa Simbahan. Sila pud ang mopahigayon sa “De Angelis CaFe Progam” kun Catechism and Feeding Program.

5. St. Benedict Ministry

Pundok kini sa mga edaran nga dili na makahimo sa aktibong pangalagad sa katilingban ni San Miguel Arkanghel ilang tahas ug misyon mao ang paghalad og mga pag-ampo ingon man pagsakripisyo alang sa katilingban ni San Miguel Arkanghel diha sa mas hilit nga paagi. Sila ang nagsilbing spiritual powerhouse sa katilingban.