Paghinugasay kamo.....

Teksto: Jn. 13;1-19

Dili pa lang dugay nahitabo ang pagkamatay sa mga 17 ka mga pasahero sa sakyanan gumikan sa pagkabangga niini sa usa ka dumptrack ngadto sa Mindanao.

Ang mga tawo labina gyud ang duroha ka mga lalaki nagpunay lamang og video daw sa walay nahitabo. Makaingon ta nga ang common sense karong mga Panahona nahimo nang dili common. Butang nga makapasagmuyo sa kadaghanan kanato….

Ang Huwebes Santo nipahinumdom kanato nga ang atong Ginoo bisan pa man kun siya usa ka pangulo ang nihuikas sa iyang sapaw ug nagtapis aron sa ingon iyang hugasan ang mga tiil sa iyang mga tinun-an niadtong nihimo sila sa katapusang panihapon.

Ang maong buhat pagpakita lamang sa sanglitanan nga kinahanglan nga  maghinugasay nga sa ato pa mag-inalagaray. Subo palandungon nga ang pulong pangalagad usa na lamang ka dakong duhiraw alang kanato karon kay bisan gani ang anaa sa pangagamhanan ang buot manalipod lamang sa ilang personal nga mga interest kaysa kaayohan sa kinabag-an.

Maayo kun anaa pa sa pagsugod kay kusog kaayo mosaad ug mobulatik apan sa kaulahian nahimong buta bungol sa mga kahigwaos sa ilang mga dumadapig.

Malisod pud ang paghaling sa tagsa tagsa ka mga tanlag aron manginlabot sa mga panghitabo sa palibot. Daghan na karon ang nahimong indifferent ug mabudhion.

Mao nga husto gyud ang pangutana nga sa pagbalik sa Ginoo sa Adlaw sa Panghukom makakita pa ba siya og Pagtuo gikan natong mga tawo?