Simang

Simang ang pagpasabot ni Cebu City Mayor Michael Rama nganong nisang-at siya og kasong administratiba batok ni Gobernador Gwendolyn Garcia didto sa buhatan sa presidente.

Matud ni Rama wa kunoy lalis sa baruganan sa gobernador pagprotihir sa Kapitolyo isip usa ka heritage site.

Ang hinungdan kuno nganong iyang gikiha ang gobernador mao ang pagpanghilabot niini sa proyekto sa Cebu Bus Rapid Transit dinhi sa dakbayan.

Wala kunoy gahom ang gobernador pagmando sa kontraktor sa CBRT nga ihunong ang proyekto.

Sayop ang pagsabot sa mayor sa kamandoan sa gobernador. Kun gibasa ug gisabot niyag tarong ang kamandoan sa gobernador dili tingali siya modangop pagpasaka og kaso tungod kay matud niya wa man kunoy lalis sa pagprotihir sa heritage site sama sa Capitol building.

Wala momando ang gobernador paghunong sa proyekto. Klaro ang iyang kamandoan, ang hunongon mao ang construction sa CBRT station sa Osmeña Boulevard duol sa provincial Capitol kay makasampong kini sa view sa building.

Gani gipadayon sa kontraktor ang trabaho sa mga station sa ubang bahin sa rota.

Simang ang argumento sa mayor nga way katungod ang gobernador pagpanghilabot sa proyekto sa syudad.

 Dili panghilabot ang gihimo ni Garcia kun dili pagprotihir sa interest sa lalawigan diin siya maoy gitugyanan sa mga Sugboanon pinaagi sa makabungog nga mandato sa miaging eleksiyon. Ug kini maoy di malalis ug matuis nga kamatuoran.

Gawas pa Kapitolyo maoy nanag-iya sa luna diin gitukod ang CBRT station busa may gahom ug katungod ang gobernador pagbadlong nila.

Kun di lang arogante ug garboso si Rama mahimo ra unta nilang mahilot ang isyu nga di kinahanglang mosangko sa pagpangiha.

Mahimo untang nakigtagbo ang mayor sa gobernador aron hisgutan unsaon nga makurihian ang problema nga mugna sa ilang kapakyas pagpangayo og pagtugot gikan sa historical commission alang sa disenyo sa proyekto.

Tingali masulbad ang maong problema pinaagi sa sabot-sabot sama pananglit sa pag-usab sa disenyo sa station diha duol sa kapitolyo.