Hinuktuki ang imong mga sala

Semana Santa na man diay, Martes Santo na karong adlawa. Kinahanglang hinuktokan na nato ang atong mga nahimong sala, ug ato kining pagabasolan, ug mangayo kita og pasaylo.

Matud pa bitaw sa panultihon nga ang pagpakasala tawhanon, ug ang pagpasaylo balaanon. Ako sa akong bahin, kon ang mga tawo nga nagpakasala kanako mangayo og pasaylo, kinsa man ko nga dili makapasaylo?

Dunay mga tawo nga dali kaayo makapasangil og mga sala ngadto sa ilang isig ka tawo. Dunay tawo nangintriga aron ang iyang kauban masuko ngadto sa lain nilang kauban.

Gipalakaw og tabi-tabi sa maong tawo nga ang usa niya ka kauban maoy naghulhog sa ilang labaw aron nga ang suod niyang higala matangtang sa serbisyo, bisan og dili gyud tinuod.

Kini ra ba’ng tawhana nga mihimo’g pangintriga, wa gyuy maayong serbisyo kay dili gani motuman og kamandoan gikan sa iyang labaw, ug dili usab kanunay’ng motambong sa iyang duty.

Unta, karon kay Semana Santa man, makahinuktok unta ang maong tawo nga dakong sayop ug usa ka sala ang iyang gihimo kay makamugna kini og kasilag ngadto sa nagbinuotan.

* * *

Mitambong ko sa general assembly sa Barangay Apas, Cebu City kaniadtong Domingo, ug didto nako mahibaw-i nga si Kapitan Jingjing Cabigon midonar og usa ka fire truck para sa barangay.

Gipalit ni Kapitan Cabigon ang maong fire truck para sa barangay isip pasalamat sa mga lumolupyo sa Barangay Apas nga mihatag kaniya’g laing higayon ngna makadumala sa barangay.

Ingon niana ang maayong opisyal kay mahal baya ang fire truck, ug kon hakog pa siya’g kwarta gitigum na lang unta niya ang maong kantidad nga iyang gipalit og fire truck.

Nahibaw-an usab nako nga karong tuiga gipausbawan ngadto na sa P1.5 million ang kantidad nga gitakana aron ipalit og mga tambal nga magamit sa mga lumolupyo.

Ang mga lumolupyo gud sa Barangay Apas makapangayo man og mga tambal sa barangay health center, ug duna say libre nga pagpamakuna, ilabi na sa mga tiguwang na.

Ingon niana gyud ang maayong pagpangalagad sa katawhan nga gawas sa mga proyektong inprastraktura, dili gayud kalimtan ang pag-atiman sa panglawas sa mga lumolupyo sa barangay.         

Pahimuslan diay nako pagpasalamat si Rey Suelto, ang action man ni Kapitan Cabigon kay abtik kaayo nga moatiman sa mga problema.

Gani, siya tungod sa programa nila ni Kapitan Cabigon, limpyo na kaayo ang GMA Road nga kaniadtong pwerteng bahoa kay nahimo na unta nga labayanan sa mga basura.

Gibutangan nila’g outpost ang GMA Road ug limpyo na kaayo ang karsada. Salamat Kap Cabigon ug sa tanang opisyal sa Barangay Apas.