Mga barangay officials gidasig paghatag og maayong serbisyo

CEBU, Philippines — Dul-an sa 900 ka mga barangay officials sa probinsya sa Sugbo ang nitambong sa 2024 Liga ng mga Barangay Cebu Province Year-End Convergence nga gipahigayon sa Lapu-Lapu City, Martes sa buntag.

Lakip sa nitambong sa kalihukan mao si Senador Francis Tolentino, kinsa maoy dinapit nga mamulong.

Atol sa pakighinabi ni Tolentino, atubangan sa mga barangay opisyal gibutyag niini ang mga balaodnon nga padayon nga gipanday lakip ang pagdis-og sa election sa barangay sunod nga tuig.

Matud pa ni Tolentino, dako ang kahigayonan nga walay election nga mahitabo sa sunod nga tuig.

Atol sa pakigpulong ni Tolentino, gipahinumduman usab niini ang mga opisyal sa barangay nga padayon mohatag og maayong mga programa ug serbisyo sa katawhan.

Dugang pa ni Tolentino, bisan taliwala sa kagubot sa mga dagkong opisyal sa kaulohan giawhag niini ang mga opisyal nga dili lang sila magpadala ug magpaapekto niini og mopadayon lang sa pagserbisyo.

Si Celestino Martinez III ang President sa Liga ng mga Barangay Cebu Chapter ug LNB Secretary General nibutyag nga ang ilang panagtagbo sa mga opisyal sa barangay aron tukion nila ang mga kalampusan sa kabarangayan ug sa ilang umaabot nga plano para sa sunod nga tuig.

Dugang pa ni Martinez, sila sa mga opisyal sa kabarangayan dili mag-apil-apil sa mga kagubot sa opisyal sa kaulohan ug malaumon sila nga maresolba kini og mapangitaan og pamaagi. (BANAT NEWS)