Mga sinaligan ni Sara
Sa iyang paglingkod isip education secretary, si Bise Presidente Sara Duterte nitudlo og duha ka retiradong heneral sa Department of Education (DepEd): Undersecretary si Major General Nicolas Mempin, kanhi commander sa 10th Infantry Division sa Philippine Army (PA) sa Davao region; ug assistant secretary si Brigadier General Noel Baluyan sa 3rd Infantry Division.
Gihulagway sa DepEd ang ilang trabaho nga confidential. Mao nga dihang gi-imbestigar sa House of Representatives ang confidential funds (CF) sa DepEd ug sa Office of the Vice President (OVP), gipaabot nga unang ipatawag silang Mempin ug Baluyan.
* * *
Pero dihang niatubang si Mempin sa House Committee on Good Government sa niaging buwan, nahibaw-an sa mga kongresista nga gamay rang iyang papel: Gisugo rang Atty. Michael Poa, kanhi tigpamaba sa DepEd, pagpangita og certification sa P15.54 milyones nga rewards sa informers nga gi-disallow sa Commission on Audit (COA) kay walay supporting documents.
Salamat sa certifications nga iyang nakuha sa PA ug gisumiter ni Poa sa COA–nga parte diay sa youth leadership summits (YLS) nga walay gasto bisan usa ka dako ang DepEd–nisamot ang pagduda sa mga kongresista.
* * *
Dihang sa kataposan nipakita na sa mga kongresista niadtong Lunes, silang kanhi DepEd disbursement officer Edward Fajarda ug OVP disbursement officer Gina Acosta niila sa duha ka opisyal sa militar nga maoy gisaligan ni Duterte sa paggasto sa iyang P500 milyones nga CF sa OVP sa 2022 ug 2023 ug P112.5 milyones nga CF sa DepEd sa 2023.
Pero dili silang Mempin ug Baluyan ang ginganlan. Kon dili silang Koronel Dennis Nolasco ug Koronel Lachica sa Vice Presidential Security and Protection Group (VPSPG).
* * *
Kaila ba si Mempin ug Baluyan ni Nolasco ug Lachica? O tinuod ang pangangkon ni Duterte nga iyang management style ang pagtago sa labing importanteng mga trabaho gikan sa iyang mga sinaligan?
O kabahin ang mga testimoniya nilang Poa ug Mempin sa lipatlipat ni Duterte sa kuwestiyonableng mga transaksiyon sa iyang CF?
Nakatsamba bang mga kongresista sa mga testimoniya nilang Fajarda ug Acosta ug sa posibleng pagtambong sa sunod hearing nilang Nolasco ug Lachica? O mahugno rang imbestigasyon inig insistir ni Duterte nga supak sa balaod ang pagtuki sa CF?
* * *
- Latest
