Dul-an 100 balay naugdaw

CEBU, Philippines — Miabot sa dul-an 100 ka panimay ang naugdaw sa sunog sa Sitio Atisan, Barangay Cansojong, Dakbayan sa Talisay kagahapon sa buntag.

Ang kabumberohan sa Talisay nakadawat sa alarma mga 11 pasado sa buntag dayon gilahos na nila kini sa first alarm.

Dali nga nikatay ang kalayo gumikan sa kainiton sa panahon, nagbale-bale ang hangin ug ginama sa light materials ug concrete ang mga panimay.

Matud pa ni FO2 Mar Dee II Auxtero nga nagkalisod sa ilang pagpawong sa kayo mao ang pagkasudlonon sa lugar nga nasunog.

Asoy pa niya nga ila nalang gisumpay-sumpay ang mga hoses aron makaabot sa fire scene.

Naabot gyud sa 4th alarm ang estado sa sunog sa wala pa nila madeklarar nga fire under control sa alas 12:10 sa udto dayon hingpit nga na fire out mga alas 12:30 sa udto.

Sigon pa ni Auxtero nga diha sa panimay ni Wilson Labuca nagsugod ang kalayo pero padayon pa nila nga gisuta kung unsa ang hinungdan sa kalayo.

Atol sa sunog adunay mga nibuto sa lugar ug gituohang mga butane o LPG o ba kaha kuryenti ang nibuto.  Gibana-bana nga moabot sa P1.5 milyones ang danyos sa sunog. Sumala pa sa kambomberohan sa siyudad, 93 ka balay nga gipuy-an og mga tagiya ang hingpit nga naugdaw, 13 sab ka sharers, 18 ka renters  ug usa ang nakan-an sa kalayo.

Moabot 125 ka pamilya ang naapektahan o moabot  481 ka tawo ang nawad-an og pinuy-anan.

Pagkahapon kagahapon, gitubag ang maong sunog sa Phase 1, Villa Leyson sa Barangay Bacayan sa Cebu City diin usa ka balay ang naugdaw ug naangol sab ang tagiya niini nag si Paz Blanco human nakaangkon og paso.

 Padayon pa ang kabomberohan sa ilang imbestigasyon.  — IBM BANAT NEWS