Daghan ang nakasabot

Human nako mahisgoti dinhi kon pila ang kita sa Cebu City Transportation Office (CCTO) sa makolektang parking fees sa wa pa itugyan sa Tokagawa Global Corporation ang pagpangolekta sa bayad sa moparking daplin sa karsada, daghan ang miingon nga ibalik na lang sa CCTO ang pagkolekta sa parking fees.

Nakaingon ko nga tukma ang baruganan sa mga tawo nga nakabasa sa akong lindog, kay nasabot man gyud nila nga ang Cebu City government nabentahaan sa mga lagda nga gilatid sa Jont Venture Agreement (JVA) tali sa Tokagawa.

Sayonan ka nga sa usa ka tuig ang siyudad modawat lang og P8.7 million gikan sa kinatibuk-ang kantidad nga makolekta sa Tokagawa gikan sa parking fees? Panagsa, pasubrahan nila og gamay nga mora’g nag-ulog-ulog sa siyudad.

Bisan si Mayor Michael Rama wa na malipay tungod kay miabuso na ang Tokagawa, pinaagi sa CEPMA, nga bisan og Domingo mangolekta sila nga wa man unta kini itugot sa ordinansa.

Ang pagpangolekta og parking fees gitugot lang sa ordinansa gikan sa Lunes hangtud sa Sabado, ug gikan sa alas 7 sa buntag ngadto sa alas 7 sa gabii, Apan manglekta gihapon sila hangtud sa alas nuybe sa gabii.

Unya, moingon nga halos alkanse kuno ang Tokagawa, nga duna man gani karsada nga nangolekta sila bisan og wa kini itugot sa ordinansa nga nagdeklarar sa maong road side parking nga legal.

Apil niining maong mga karsada ang kilid sa CTU University ug ang Legaspi Extension, sigurado ko nga duna pay uban nga mahibaw-an ra kon himoan kini og imbestigasyon.

Kaniadto dihang ang CITOM ug CCTO pa ang nangolekta, mokolekta gud og P38 million sa usa ka tuig, dunay P39 million, duna say P33 milyones.

Bisan pa og ibanan kini sa sweldo sa mga parking fee collectors, sigurado ko nga dako pa gihapon ang mahibilin sa kita ug kapahimuslan kini nga magamit sa mga proyekto sa siyudad.

Unta, sa pagsige nako og pasabot niini, masabtan ra unta sa mga opisyal sa siyudad, ilabi na sa mga sakop sa City Council, ug mohimo na unta sila og lakang base sa katuyoan ni Mayor Rama.

Daghan ang nagtuo nga dunay mga opisyal niini nga nagproteher aron mapadayon gyud nga ang pagpangolekta sa parking fees dili makuha gikan sa Tokagawa.

Abi ninyo og ngano? Ingon sa magpanuko sila paghimo’g lakang nga maputol na kining mao nga kasabotan. Tiaw mo, bisan og klaro kaayo nga ilegal ang pagpangolekta og parking fees sa Domingo, apan wa gihapon mapahunong.