Alegre ang moabot piniliay sa syudad

Sunod tuig pa ang eleksiyon apan di na gyud kapugngan ang pagbukal sa kaldero sa politika dinhi sa dakbayan sa Sugbo.

Ang mga nangambisyon og pwesto sa dakbayan linga na sa pagpangampanya diha sa kabarangayan.

Ug sa akong tan-aw alegre ang umaabot nga eleksiyon sa syudad tungod kay posibleng lima ka lig-on nga mga kandidato pagkamayor ang sangka.

Kini naglakip sa incumbent nga si Mayor Michael Rama, kanhi Customs commissioner Yogi Ruiz, MCWD chairman Joey Daluz III, Councilor Nestor Archival, ug si Bise Mayor Raymond Garcia.

Nilang lima si Rama ug Ruiz pa lang ang medyo klaro na. Si Daluz nagpadayon pa sa iyang konsultasyon apan sa akong pakighinabi niya 70 porsiyento na ang posibilidad nga siya mopapili pagkamayor.

Si Archival  gituboy ni kanhi mayor Tomas Osme a apan nagduha-duha tungod sa dakong gasto nva gikinahanglan.

Si Garcia gitanyagan ni Rama nga mahimo gihapon niyang tandem apan kun imong basahon ang iyang mga  lihok  dili imposible nga siya mopapili pagkamayor.

Nilang lima si Ruiz maoy  bagito sa politika apan dili sa pagpangalagad sa publiko. Bisan wa pa siyay kasinatian sa politika sama sa upat nga posibleng iyang kaatbang,  apan beterano na sab siya sa public service.

Kanhi regional director siya sa PDEA-7 ug nahimong commissioner sa customs. Busa di sab mabaliwa ang iyang katakos ug maisip siya nga lig-on nga alternatibo nga kapilian sa katawhan labi na niadtong napul-an na sa mga politikong nanggungis na sa pwesto.

Sa dihang nahimo nakong bisita si Ruiz sa The Freeman Hot Seat niadtong Huwebes, iyang gitug-an nga ang iyang kasagmuyo sa pagpasagad sa mga opisyal sa dakbayan sa batakang serbisyo maoy nagtukmod niya nga mosalga sa politika ug isakripisyo ang haruhay na unta niya nga pavpuyo uban sa iyang pamilya.

Lima ka batakang serbisyo ang gusto niyang tutukan  kun modaog pagkamayor--waste management, flooding, traffic, health services ug peace and order.

Nagtuo si Ruiz nga ang investment nga maghatag og kalamboan mosunod ra kun matubag ang lima ka batakang serbisyo. Kinsa ba tuod nga negosyante ang ganahan mamuhonan sa dapit nga kanunay'ng gilunopan, hugaw kay way klarong atiman ang basura ug labihan ka traffic?

Kinsa may negosyante nga mobutang og kwarta sa dapit nga dako og problema ang kahapsay ug kalinaw?

Husto si Yogi niining maong punto ug labaw na sa iyang giingon nga ang basura maoy dapat i-recycle dili ang mga politiko nga nanggungis na sa katungdanan apan wa kasulbad sa mga batakang problema sa syudad.