Papogi sa Senado

Kinsa bay trabahante di ganahan og umento sa sweldo? Apan kun ang usbaw moresulta hinuon sa pagpanirado sa daghang mga gagmay'ng patigayon ug pagkahanaw sa panginabuhi sa daghang mamumuo, mas palabihon ko ang dyutay'ng kantidad nga ihatag pinaagi sa regional wage board kay sa P100 nga legislated increase nga giproponer sa Senado.

Husto ang presidente sa Cebu Chamber of Commerce Charles Kenneth Co nga kun mahitabo ang gusto sa Senado apektado ang labing minus 90 porsiyento sa mga patigayon sa nasud nga maisip nga micro, small ug medium enterprise.

Matud ni Co nga ang gagmay'ng patigayon maoy labing apektado sa tinguha sa Senado nga P100 nga umento sa inadlaw'ng suholan sa mga trabahante sa pribadong sektor.

Gawas niini di sab tanang trabahante makabenepisyo niini tungod kay ang ubang kabus nga maapektohan sa inflation mugna sa umento sa suholan di man makapahimus niini.

Pananglitan ang mga anaa sa service industry sama sa mga kargador, tig-ayo og sapatos, ug uban pa nga way employer.

Nahibawo natang daan nga ang dagko nga mga negosyante di gyud maapektohan sa umento tungod kay duna silay option nga ipatong ni sa presyo sa ilang mga produkto.

Ang alaot sa kaulahian mao lang gihapon ang ordinaryo nga mga trabahante nga maoy mopas-an sa epekto niini.

Mahimong maayo ang intensiyon sa Senado niini apan angayan ning tun-an og maayo kun mao bay hustong paagi pagtabang sa mga kabus.

Kay sa pagkatinuod nabalaka ko nga labaw kay sa maayong intensiyon sa mga Senador nagpahipi ang personal nilang motibo pagpahumot sa mga botante labi pa nga eleksiyon na sa sunod tuig.

Apan angayang di palingla ang katawhan niining klarong papogi sa Senado tungod kay nahibawo ang mga Senador nga way mahimo ang ilang balaudnon nga napasar na sa second reading kun way samang balaodnon nga ipasar ang ubos balay balauranan.

Ug sa kasamtangan way bisan usa ka kongresista, bisan ang mga partylist representative sa labor sector, nga nangahas pagduso og counterpart bill.

Sa laktud way padulngan ning gihimo sa Senado.