Kuwang sa kumunikasyon

Bisan way contingent gikan sa kalungsoran ug mga dakbayan sa lalawigan sa Sugbo nga mosalmot sa Sinulog 2024 grand showdown duha ka semana gikan karon, di na mausab ang baruganan ni Cebu City Mayor Michael Rama nga adto ni himoon sa South Road Properties (SRP).

Ug nakasabot ko sa rason ni Rama nganong bisan way mosuporta niyang mga mayor sa probinsiya di gyud mabali ang iyang desisyon---kini tungod sa siguridad.

Atol sa Pilot Episode sa The Freeman Hot Seat niadtong Huwebes diin si Rama maoy bisita, ako siyang gipangutana unsa ba gyuy hinungdan nga di man siya gusto nga sa Cebu City Sports Center himoon ang Sinulog nga unta mao man kini ang naandan nga venue sulod sa daghan na nga katuigan nga milabay?

Gipasabot ni Rama nga tungod sa nagkadaghan nga tawo nga mosalmot sa Sinulog nagkataas sab ang risgo sa siguridad. Matud niya gamay na ang CCSC alang sa minilyon ka mga tawo nga modugok aron pagsaksi sa Sinulog ug di siya buot nga dunay mahitabo nga dili maayo sama sa stampede nga posibling dunay mga kinabuhi nga makalas. Sigun sa iyang obserbasyon sa mga miaging kasaulogan, bisan ang kadalanan labihan na ka huot nga lisud na gani nga makontrolar sa awtoridad. Busa aron paglikay sa posibling stampede iyang nahukman nga ibalhin sa SRP tungod kay mas lapad ang maong dapit.

Way lalis sa tumong ug katuyoan sa mayor alang sa kaluwasan sa mga mosalmot sa Sinulog. Ug sigurado ko nga makasabot ang mga mayor sa probinsiya sa Sugbo lakip na si Gobernador Gwendolyn Garcia niini kun iyang tarungon sa pag-isplikar.

Apan ang problema ni Rama, nagdumili siya nga makigtagbo sa gobernador ug sa mga mayor aron ipasabot ang sitwasyon ug tubagon ang ilang mga kahingawa ug kabalaka. Di niyang mabasol ang gobernador ug mga mayor kun mabalaka sa siguridad sa ilang mga contingent tungod kay wa may nihatag nila og kasigurohan.

Ang mga kahingawa mapapas unta kun duna pay klarong komunikasyon ug kun nakigtagbo pa si Rama ug personal nga pasaligan ang gobernador ug mga mayor nga mahuman ang venue sa dili pa ang Enero 21. Malikayan sab gyud unta kining maong isyu ug milihok pa og sayo ang dakbayan sa ilang preparasyon. Dili raba moangkon ang mayor nga atrasawo ang ilang pagpangandam kay kuno Agosto pa sila nagsugod sa preparasyon. Ang nagkapuliki nilang trabaho sa venue hangtod ron maoy tataw nga ebidensiya kinsay nagsulti sa tinuod.