Berdugo sa panginabuhi

Samtang nalingaw ang uban, lakip sa ubang mga opisyal sa kagamhanan, sa ilang bakasyon nunot sa taas nga holiday daghan sa mga kabus ang mas gipili nga magpadayon sa ilang panginabuhi sa patas ug tinarong nga paagi.

Lakip nila ang mga tindiro diha sa kadalanan nga wa igsapayan ang init ug uwan aron may kita alang sa pamilya.

Saludo ko sa mga tawo nga bisan sa kalisod nakigbisog sa kinabuhi sa tinarong ug patas nga paagi.

Niadtong Biyernes sa hapon samtang nangita ko og parking sa may uptown area nadapit ang akong pagtagad sa mga sakop sa PROBE Team sa dakbayan sa Sugbo.

Ilang gisita ang tindiro og butong gamit iyang karumata kilid sa dalan F. Ramos ug ang naninda og pagkaon gamit iyang trisikad sa pikas habig sa karsada.

Gitapuk-an sa mga sakop sa PROBE ang duha ka tindiro samtang giisyuhan og ticket paglapas sa ordinansa sa dakbayan.

Human isyuhi og citation ticket gikarga sa mga sakop sa PROBE sa ilang sakyanan ang karumata ug trisikad.

Minghoy intawn ang duha ka mga tindiro ug nagpanlingo unsaon pagdala ilang mga baligya nga wa na man silay kargahan.

Di ko sigurado unsay ilang nahimong kalapasan apan di ba mahimo nga badlongon ug pabalhinon lang sa dapit nga gitugot nga sila makabaligya inay sakmiton ang ilang gamit sa pagpanginabuhi?

Mahimong alang sa mga may kaya wa ray bili ang karumata ug trisikad apan alang sa duha ka mga tindiro tumbas ni sa ilang kinabuhi.

Alang nila nga pila ra intawoy halin matag-adlaw singot ug dugo ang ilang puhonan aron ilang maangkon ang maong mga gamit alang sa ilang panginabuhi.

Salikwaot nga inay ang gobyerno ang mosiguro nga kaprotehian ang mga kabus nagsilbi na hinuon kining berdugo sa ilang panginabuhi.

Hinaot nga magmasinabtanon ang kagamhanan sa dakbayan alang niining mga kabus nga nanlimbasog aron mabuhi sa tarong ug patas nga paagi.