Gullas naglaom mabuksan na ang dialysis center

CEBU, Philippines — Nagmalaumon si Talisay City Mayor Gerald Anthony  Samsam Gullas,Jr. nga mabuksan na ang serbisyo sa dialysis center.

Kini maoy iyang gibutyag atol sa pormal nila nga pag-turn-over sa social services building.

Matud ni Gullas nga wala nila kini madungan ang pagbukas tungod kay nagproblema ang PhilHealth human na-hack ang ilang system.

Gibutyag ni Gullas nga ang taga PhilHealth nisaad kaniya nga magtigom sila karong adlawa aron mahan-ay ang ilang accreditation.

Si Gullas nagkanayon nga sa iyang termino isip kongresista kaniadto iyang nakita ang ka problema sa matag pamilya kun adunay sakop niini nga nipaubos na sa dialysis.

 Kay naa naman tay atoa nga dialysis center dili na maglisod ang Talisaynon nga moadto sa siyudad o adto sa Dakbayan sa Carcar , ni Gullas pa.

Sa ilang pasiuna, 150 ka sesyon matag tuig ang ilang ihatag sa Talisaynon diin ang matag sesyon mokantidad og P2,600 nga ihatag nga libre sa PhilHealth.

Gitataw sa mayor nga sa matag sesyon adunay mga tambal nga gastohon pa sa mga pasyente hinungdan nga nihangyo siya sa konseho sa siyudad nga mohimo og ordinansa aron mahatagan sab og tag P1,000 alang sa tambal.

Ilaha kining gituyo nga tag P1,000 lang usa tungod kay wala pa sila masayod kong pila gyud ka tawo ang nagkinahanglan sa pag-dialysis. (BANAT NEWS)