EDITORYAL - Kagawasang angay panalipdan

Kagahapong adlawa gisaulog sa Pilipinas ang Day of Valor o Araw ng Kagitingan alang sa paghinumdom sa tanan sa gihimong sakripisyo sa mga nahaunang mga Pilipino nga nakigbisog alang sa kaugalignan ug kagawasan sa kung unsa ang nasud karon.

Sa modernong panahon, wala na karon ang mga koloniya o mananakop nga mga gamhanang nasud, kay sila mismo nakat-on sa pagdagan sa panahon nga dili na kini mahimo karong panahona tungod kay ikaguba kini sa ilang nasud.

Apan dinhi sa Pilipinas, samtang gawasnon na kini gikan sa ubang mga nasud, naa pa gihapon ang mga hulga nga bisan unsang orasa posibleng mawagtang ang gitagamtam nga kagawasan sa katawhan niini.

Ang dakong hagit karon sa mga Pilipino ang inadlaw-adlaw nga pakigbisog aron makalahutay tungod sa kakabus ug kawad-on. Dunay dakong gintang ang nahimutangan sa mga adunahan ug sa mga kabus nga dili madali nga matabunan ug ipadaplin.

Ang pakigbisog karon naa sa tagsa-tagsa ka mga Pilipino kun unsaon pagtapos ang adlaw nga mabungahon, may mga trabaho man o wala. Labaw nga nagkinahanglan ang mga walay klarong trabaho nga kada adlaw nanikaysikay aron mabuhi.

Apan bisan pa man sa kalisdanan nga nasinati karon, angay ipasalamat sa mga Piipino nga kagawasan niini nga ilang nasunod pinaagi sa dili tiaw nga sakripisyo sa mga Bayaning Pilipino nga misugal sa ilang kinabuhi dili para sa ilang kaugalingon kondili para sa kaugmaon sa kasamtangan ug sa umaabot pang mga henerasyon.

Dako og papel ang katawhan pagpreserbar niining naangkong kagawasan, pinaagi sa pagbantay batok sa mga kahiwian sa mga naa sa posisyon. Pinaagi sa pagka-mabinantayon sa mga panghitabo nga moresulta sa paghikaw sa kagawasan nga gisakripisyohan sa mga karaang bayaning Pilipino.

Angay nga hinumdoman sa tanan nga ang mga bayaning niula og dugo ug nisakripisyo para sa kaugmaon sa henerasyon sa Pilipinas wala makatagamtam aning kagawasan nga natagamtaman sa matag Pilipino karon.

Dako sab og papel ang kasamtangang mga naa sa posisyon karon sa pagmentinar niini pinaagi sa pagsigurong mahatag ang mga gisaad nga ikaayo sa katawhang Pilipino ug dili para sa kaugalingong kalamboan.