Hustisya ug kaangayan

Sumala sa report sa US Department of Agriculture, kinahanglan nga padak-an ang budget sa Pilipinas alang sa pagpatuman sa School-Based Feeding Program (SBPF) tungod sa pagdagsang sa malnutrisyon sa kabataan diha sa mga tulonghaan. Ang SBPF programa sa pagpanghatag og mga masustansyang pagkaon ug gatas ngadto sa mga undernourished nga K-6 nga tinun-an. Samtang nag-antos sa kagutom ug naghigos ang atong kabataan, nanambok usab pag-ayo ang atong mga politiko. Haum ang panultihon nga “Ang kagutom dili hisgutanan kabahin sa kamanggihatagon, kon dili, kabahin sa hustisya ug kaangayan.” Muleeeng!

Economist, dili agriculturist

Segun sa pag-monitor sa Department of Agriculture, walay isda nga bodboron (galunggong) nga mapalit karon sa kamerkadohan tungod sa giimponer nga %shing ban (closed season) gumikan kay tingbihod pa man sa maong matang sa isda. Aron mahulipan ang kakulangon, nangangkat na usab ang kagamhanan og galunggong/bodboron sa laing nasud. Kon nangangangkat, ngano’ng wala may bodboron sa kamerkadohan? Dili gayod masulbad ang mga problema sa suplay sa produktong agrikultura kay ang taga-DA, inay mopinsar ang utok isip mga agriculturist ug technocrat, mopinsar na man hinuon isip mga ekonomista. Import pa more!

Wala’y nahibilin

Adunay gihugon-hugon nga pagsaka sa presyo sa gasolina karong sunod semana gumikan lamang sa pagtoo nga makabangon ang China sa iyang ekonomiya, nga gituohan usab nga magtukmod sa taas nga panginahanglan. Dali kaayo makahatag ang mga oportunista og bisan unsa’ng rason aron lang mapasaka-an ang presyo sa maong palaliton. Ni’ng nagduyan-duyan sa presyo sa lana, walay lain malipong ug dagaton kon dili ang mga pobre’ng konsumidor. Human kuhaa sa gobiyerno ang 30 ngadto sa 40 porsyento sa imong suholan isip buhis, kuhaon na sa mga gasoline station ang nahibiling 60 ngadto sa 70 porsyento sa imo’ng sweldo. Fezteleern!

Managlahi’ng baruganan

Nanganti si Cebu City Mayor Michael Rama nga dili mo-atras ang kagamhanan sa dakbayan sa Sugbo kon ugaling buot makig-anduhay ang Cebu Port Authority kabahin sa hisgutanan sa pagpanag-iya sa Compania Maritima. Adunay tagsa-tagsa ka katuyoan sa pagpalambo ang matag habig alang sa maong lugar. Bisan si kinsa ang modaug, piho nga ang katawhan gihapon ang mabulahan. Mas maayo nga gidangop na kining hisgutanan ngadto sa korte kay ginaingon baya nga, “Dili ka mahimong makigsabot sa tawo nga may baruganan nga ‘Ang ako, ako lamang; ang imo, mahimo nato’ng sabotan!’” Madahaaan!

“Hala, naay wakwak”

Modangop sa Bohol Provincial Board ang mga mananagat sa Alegria Sur sa Lungsod sa Loay, aron mopadangat sa ilang kahingawa kabahin sa presensya sa mga butanding o whale shark sa ilang lugar nga nakapakunhod sa ilang kuha nga isda. Buot nila nga nga mopahawa sa ilang lugar ang mga butanding. Tataw nga dili pagpanday og ordinansa ang mahimo sa Provincial Board. Makapahinumdum sa bata nga naproblema sa mga manok nga nagsige’g toktok sa binuwad nga humay mao nga gitambagan siya sa iyang amahan nga HADLOKON ang mga manok aron mohawa. Busa mibalik ang bata ug giingnan ang mga manok, “Hala Nok, naa’y wakwak!” Pagkatoytoy!