Mga milagro sa kaso ni Remulla
Sukwahi sa mga pasalig sa administrasyon nga di paboran ang dinakpan ug ipasubay sa tanang lagda ang imbestigasyon ug prosekusyon sa mga kasong kriminal nga gipasaka batok ni Juanito Jose Diaz Remulla III, nagkataas na ang listahan sa kahibulongan nga mga panghitabo:
• Nadakpan si Juanito III niadtong Oktubre 11 sa BF Resort Village sa Las Piñas human nidawat sa package gikan sa usa ka Benjamin Huffman sa San Diego, California nga gideklarar nga hooded sweaters, pero gipalabay ang duha ka adlaw una gipahibawo sa publiko niadtong Oktubre 13 ang iyang pagkasikop;
• Gipaundayonan sa Philippine Drug Enforcement Agency (PDEA) ang pagbalibad ni Juanito III nga magpa-drug test, sukwahi sa Section 38 sa Republic Act 9165 o ang Comprehensive Dangerous Drugs Act, nga nagsugo sa mandatory drug test o laboratory screening sa tanang drug suspects nga madakpan, sud sa 24 oras human sa pagkasikop; ug
• Nag-anam kagaan ang high grade marijuana nga giingong nasakmit gikan ni Juanito III–gikan sa usa ka kilo nga unang gipahibawo sa PDEA, nahimong 930 grams dihang gipakita sa media, ug nigaan ngadto sa 893 grams pag-abot sa piskaliya.
* * *
Kon di pa siya anak ni Justice Secretary Boying Remulla, si Juanito III mahisama unta sa ubang dinakpan sa PDEA nga gipasul-ob dayon og t-shirt nga may baga nga marka nga “PDEA DETAINEE” ug giparada atubangan sa mga kamera sa media nga way bisan gamay nga tabon ang nawong.
Kon anak pa siya og manananggot, mahimong ganing wa na ipresentar sa media kay nagbad-ay na sa eskina, gipasanginlan nga nisukol ug gitamnan og rebolber.
* * *
Ang amahan sa dinakpan, bisan wa pa magsugod ang husay sa mga kaso, nilapas na sa iyang pasalig pagpatigbabaw sa kaligdong sa iyang upisina ug pagpadayon sa iyang tahas pagpalambo sa sistema sa hustisya sa nasud.
Gibalibaran niyang reporters pag-interview niya. Kay eksklusibong niatubang sa TV network ni Pastor Apollo Quiboloy. Nga gipasanginlang nipakatap og fake news. Ug kansang extradition sa Estados Unidos–tungod sa mga kasong conspiracy to engage in sex trafficking by force, fraud and coercion and sex trafficking of children; sex trafficking by force, fraud and coercion; conspiracy; ug bulk cash smuggling–segurong ipasaka para sa pagsubli sa DOJ.
* * *
- Latest
