Political dynasty

Gipahibawo ni Bise Presidente Sarah Duterte nga magpapili pagka senador karong 2025 nga elections sila si kanhi Presidente Rodrigo Roa Duterte, Davao City Mayor Baste Duterte ug Congressman Paolo Duterte.

Daghan ang miisa sa ilang kilay pagkadungog sa pahibawo sa bise presidente. May miingon nga wala na gyod lain diha? Sila na lang gyod?

Para nako wala gyod problema kun managan ang mga Duterte sa bisan unsa man nga position sa gobiyerno sa nasud tungod kay ila kining katungod. Wala gyod magbuot ug makapugong sa ilang gusto.

Ang ato lang, modaug ba sila? Wala man god magpasabot nga kun magpapili ka, modaug ka na, kay dili man lang ikaw ang mobotor. Ang mga botante ang magbuot, ila bang padagon ang kandidato. Busa ayaw mo kabalaka kun modagan pagka Senador ang mga Duterte kay wala na magpasabot nga modaig sila.

Kun ugaling modaug ang mga Duterte human sa eleksiyon, dili pod na nila sala kun dili sala sa mga botante nga mibotar nila.

Kun modaug ang mga Duterte sa pagka senador sa sunod election, mao ni ang buhing kamatuoran nga dili ang mga politiko ang nagtukod og dinastiya sa politika dinhi sa nasud kun dili ang mga botante.

Mao nga akong gibalikbalik sa pag-ingon dinhi sa akong lindog ug sa akong programa sa radyo sa Xfm 88.3 Cebu nga wala na kinahanglana nga idili sa atong batakang balaud ang dinastiya sa politika tungod kay ang mga tawo man ang maghukom si kinsa ang ilang palingkoron ug hatagan og gahom sa gobiyerno.

Naa bitaw provision sa atong batakang balaud nga nagdili sa dinastiya sa politika gipakatulog ra man sa mga kongresista ug mga senador. Na wala gihapoy pulos kay kinsa ba pod nga kongresista ug senador ang magpalabang og balaud nga supak sa dinastiya sa politika nga maunay ra sila.

* * *

Pulos ba mga banga ang mga abogado sa gobiyerno nga naglutos sa kanhi senador nga si Laila le Lima tungod sa pagkalambigit niini sa ginadiling drugas tungod kay pulos man giabsuwelto sa iyang kaso ang kanhi senador? O ba kaha, tumo-tumo ra gyod ang tanan sa administrasyong Duterte ngadto kang de Lima.