Grupo sa mga kawatan mo-enter pud sa Palarong Pambansa?

Kong adunay mga advance party sa mga delegado gikan sa ubang mga dapit sa nasud nga mosalmot sa Palarong Pambansa 2024, aduna usay mga kiriwan og kamot nga nakigdungan kanila. Sama nalang niining grupo sa mga kawatan nga nag shopping sa usa ka convenience store diha sa Basak San Nicolas dakbayan sa Sugbo.

Nahibulong ang tindera nga nigamay man ang sulod sa ilang tindahan nga bag-o ra man unta nangumpra ang iyang amo. Ug dihang gitan-aw nila sa CCTV, uy nakita ang mga katol og kamot nga namunit sa mga tinda ug gisulod sa bag ug aduna usay gisoksok sa biste sa babayeng kawatan.

Modus nila nga adunay magkwenta didto sa tindera ug kong malipat na ang uban nagmaneho na diay sa pagsuksok sa ilang mga kinawat, samtang ang mga kauban naa na sa gawas nag-atang isip lookout. Systematic kaayo ang ilang lihok aron molampos sa ilang krimen.

Nadala gyud nila ang mga tinda nga nagkantidad og P15 mil nga naglakip sa mga assorted goods ilabi na kadtong masipitan sa ilang bilahan pastilan manimaho gyud sa kabaho sa ilang pagkatawo.

Tungod kay wala pa man mahurot ang tinda, mibalik na usab sila sa pagkasunod adlaw apan abtik man pud ang tag-iya nga nakig alayon sa kapolisan sa Station 11 ug didto nadakpan ug nabalhong sa bilanggoan ang mag tapolan nga tampalasan nga nagsalig sa kusog sa uban, wa gabae.

Dihang giadto sa mga pulis ang boarding house didto nabawi nila ang mga kinawat nga tinda nga nagmatuod lang nga tinuod ang ilang pagpangawat. Dili na sila kalimod kay dunay CCTV ug nakuha pa gyud gikan kanila ang mga kinawat gikan sa convenience store.

Dili diay taga Sugbo sila kon dili mga imported este mga taga Bacolod City ug nidayo na karon sa Sugbo kay dinhi mamiktima ilabi na kay dunay labing dako nga kalihokan sa paugnat sa kusog sa nasod nga dinhi himoon, tiba tiba gyud unta sila kong wala sila madakpi sa mga pulis.

Seguro ang gikawat nilang mga grocery items pang konsumo nila samtang nag board sila sa syudad ug nagpaabot sa big catch ang mga atleta ug tanang delegado sa Palarong Pambansa. Tulo pa lang sa lima ang nadakpan ug naa pay lain nga angayan nga dakpon sa mga otoridad kay posibleng mangawat pa kini ug duna pa usay mga kauban.

Kong dili pa lang sala gipangtambog na kining mga kanahan sa tulay aron makuha kuhaan kining mga badlongon sa katilingban. Busa doble amping ang himoon sa mga tawo ug hugot usab nga monitoring ang himoon sa atong mga tinugyanan sa balaod aron dili makalusot kon aduna pay laing miembro sa grupo nga mangawat.

Kay nadakpan man angayan nga ipadayon ang pagpasaka og kaso. Apan pyansable man ang kaso dali ra pud silang makapyansa ug makagawas dayon balik sa naandan nga nga pagpangawat. Amping nalang gyud ta aron dili mabiktima.