Katekesis No. 3

Ulohan: Ang kagikanan sa santos nga rosaryo

Tumong: Aron sa ingon matudloan ang tanan sa bili sa Santos nga Rosaryo sa atong kinabuhing Kristohanon.

Kinahanglanong butang : Rosaryohan

Pasiunang Pag-ampo:

Maghimaya ka Maria

Maghimaya ka Maria puno ka sa Grasya ang Ginoong Dios Maanaa kanimo. Bulahan ka sa mga Babaye nga Tanan, ug bulahan man usab ang bunga sa Tiyan mo nga si Jesus.

Santa Maria, Inahan ka sa Dios ig-ampo mo kaming  mga makasasala, karon ug sa takna sa among kamatayon. Amen.

Pagpalawom

Sukad pa niadtong karaang panahon, ang mga pari, mga madre ug mga relihiyosong layko maggamit sa 150 ka mga salmo nga pangadyeon adlaw adlaw. Gitawag kini og breviary diin balaanon ang matag takna sa adlaw pinaagi sa pag-ampo sa mga salmo. 

Apan malisud kining buhaton sa ubang mga katoliko sa ilang panimalay. Ang mga rason kun nganong lisud kining buhaton naglangkob ning mosunod:

a.  Wala pa ang imprenta kaniadto busa kinahanglang kinamot ang pagsulat sa mga salmo (handwritten).

b.  Dili tanan maantigong mobasa ug mosulat.

Tungod niini naimbento ang poor man’s breviary nga mao ang santos nga rosaryo. Giampo nila ang 150 ka Maghimaya ka Maria nga pabalik balik ug gipamalandongan nila sa ilang pagpangadye ang pagkabata, kasakit ug pagkabanhaw sa atong Ginoo. Mao kadto ang mga misteryo sa Kalipay, Kasakit ug Himaya. Ulahi nang nadugang ang Misteryo sa Kahayag pinaagi ni San Juan Pablo Segundo nga maoy nipasiugda niini.

Ang Hagit sa Mahal nga Birhen didto sa Fatima ug bisan gani didto sa Lourdes mao man nga mag-ampo gyud sa Santos nga Rosaryo adlaw adlaw sa atong kinabuhi. Ang Rosaryohan hinagiban man nato batok sa gahum sa kangitngit. Gawas nga kini hinagiban batok sa gahum sa kangitngit ang Rosaryohan kahimanan sa atong pagpamalandong sa mga birtud ug ang mga rosas nga espirituhanon sa atong Mahal nga Inahan.

Ang pag-ampo sa fatima

O Jesus ko pasayloa kami sa among mga Sala luwasa kami sa kalayo sa Impiyerno ug dad-a ang tanang kalag ngadto sa langit ilabina kadtong nanginahanglan sa imong kalooy ug panabang. Amen.

Katapusang awit

O Birhen Maria, ig-ampo kami. Sa mga panulay panabangan mo kami.

Ave, Ave, Ave Maria. Ave, Ave, Ave Maria

Bitoon sa dagat, dan-agan mo kami. Sa oras nga ikamatay, panabangan mo kami.

Ave, Ave, Ave Maria. Ave, Ave, Ave Maria

N.B. Kining maong materyal mahimong gamiton sa atong mga katekista sa ilang apostolado sa pagpanudlo sa mga tunghaan ug sa mga kapilya.

Gihimo nato kining minugbo aron mas sayon ug dali. Mahimo kining gamiton human dayon sa Flag Ceremony sa dili pa mosulod sa Classroom ang mga kabataan.