Ang labing mahal nga tubig ang walay tubig

Matud ni Atty. Joey Daluz, Chairman sa Metro Cebu Water District MCWD nga ang kinamahalan nga tubig mao ang walay tubig.

Sakto gyud kay mapugos man gyud ang mga tawo sa pagpalit og tubig nga mahalon kong wala nay moagas nga tubig sa gripo ilabi na kadtong nagsalig sa MCWD.

Na-interview nako si Daluz niadtong nakalabay’ng semana sa isyu sa water tarrif adjustment nga unang gikataho nga adunay 70% nga umento diin dili diay tinood.

Gitinamban ni Daluz pagkwenta sa akong atubangan ang umento diin mosumada lang og 32% ang umento sugod sa Hulyo 1 tuig 2023 diin pun-an og P60 ang minimum nga bayranan matag 10 cubic meter kada buwan.

Alang sa mga konsumidor, dako gihapon kini nga dugang galastohan kay asa man ka manguha karon og P60 apan gipasabot sa MCWD nga gikinahanglan na gyud ang adjustment tungod kay mahal na kaayo ang palit sa MCWD sa tubig gikan sa ilang mga partner stakeholders.

Gawas pa walay subsidy nga nakuha sila gikan sa gobiyerno diin kaugalingong pundo nila ang ilang gipatuyok sa operasyon aron makapadayon sa pagserbisyo sa ilang mga konsomedor.

Ang water tarrif adjustment gisupak mismo sa mayor sa Cebu City kinsa mihangyo og review sa MCWD board kay dili rasonable karong panahana kay apektado pa kita sa pandemic ug sa nasinatian nga katalagman sa Odette.

Misugyot kini og public hearing nga mao usay himoon sa MCWD ug dinhi masayran ang sentimiento sa katawhan, atangan nato kon unsa gyud ang mamahimong sangpotanan niining tanan.

Balikan nako ang giingon ni Dalus nga “ The Most expensive water is no water at all” tinuod gyud kay base lang sa among kasinatian, duha ka semana nga walay agas sa among village kay naaksidenteng naguba sa excavation ang tubo.

Pastilan makapangutkot ka sa ka mahal sa tubig nga ipadeliver sa balay.

Moparehas ra ang.presyo sa mineral ug dili mineral tag P25 ang gallon sa tubig, mapugos gyud intawon palit aron dili mabaho ilabi na kong walay lain water source.

Kong dili man gyud kapugngan ang umento sa MCWD unta magamit kini sa pagpalambo sa ilang serbisyo nga dili na magkuwang ang supply sa mga konsumidor.