Kinsay tinuod agukoy?

Kapin sa duha ka semana gikan karon ang tuig 2020 manamilit na, apan ang konseho sa dakbayan sa Sugbo wala pa magkasabot ipasar ba ang 2021 annual budget sa dakbayan.

Basi sa ilang kalendaryo, Disyembre 16 maoy kataposan nilang regular session karon tuiga.

Ug sa akong tan-aw hanap ang kahigayonan nga ilang mapasar ang P10.8 billion sa kataposan nilang session karong Disyembre 16 sa dili pa sila mo-break alang sa Pasko.

Hinuon mamahimo silang mopahigayon og special session aron pagtiwas sa importante gimbuhaton.

Si Vice Mayor Michael Rama miumol na og adhoc committee nga motabang paghapsay sa problema aron mapasar ang budget.

Ang adhoc committee gilangkuban nilang Rama ug sa iyang mga kaalyado nga sila si Konsehal Raymond Garcia, Phillip Zafra ug Edu Rama. Apil sab silang Konsehal Lea Japson, Franklyn Ong, Nestor Archival ug Alvin Dizon sa oposisyon.

Ang kapakyas sa executive department paghatag og kwentada giunsa paggasto ang P3.5 bilyones nga pundo alang sa pagtubag sa pandemya.

Simple ra ang gipangayo sa mga sakop sa Konseho apan nganong lisud alang sa executive department ang paghatag og liquidation?

Lisud ba ang pagpakita sa mga resibo ug ubang papelis nga gikinahanglan pagmatuod nga way tinunto nga naghitabo sa paggasto sa pundo?

Inay hatagan sa kwentada nga ilang gipangayo, gihinganlan na hinuon ni Mayor Edgardo Labella og agukoy ang mga sakop sa konseho nga nangayo og husay. Matud sa mayor nga nitago ang mga konsehal nga nangita og kwentada sa panahon nga nisulbong og maayo ang mga kaso sa COVID-19 dinhi sa dakbayan.

Karon lang kuno sila nanggawas ug nagsaba-saba nga nahaw-as na ang dakbayan sa Sugbo epicenter sa mga kaso sa COVID.

Si Dizon misumbalik sa pagpangutana ni Labella diin sab siya niadto? Nganong kinahanglang ipadala sa Malacañang dinhi sa dakbayan si Sec. Roy Cimatu aron maoy mosulbad sa problema?

Kataw-anan apan way kalainan ang nahitabo ni Labella sa usa ka tawo nga nangluwa paingon sa ibabaw nga mitugpa og balik ang laway diha sa iyang nawong. So, kinsay tinuod nga agukoy nila?

Ang pangutana dili kun kinsay nitago panahon sa krisis kun dili giunsa paggasto ang pundo aron pagtubag sa krisis.

Kana maoy angayang hatagan og husay sa mayor aron malikayan ang  krisis sa budget sunod tuig.

Kun di mapasar sa konseho ang 2021 budget sa dili pa mapupos ang tuig, mapugos ang dakbayan gamit sa reenacted budget.

Buot ipasabot nga ang budget karong tuiga maoy ilang gamiton ug posibling maapektuhan ang mga mahinungdanong proyekto.