Political will o 'venganza'

Malipayon nga nangandak si Presidente Duterte nga nagmalamposon kuno siya sa pagpakigbatok ug pagbungkag sa mga oligarko nga matud pa niya maoy nagkontrolar sa ekonomiya sa Pilipinas, bisan pa man nga wala gani siya modeklarar og martial law.  Kumbati ba kini sa balaod sa nasud batok balaod sa kwarta; political will ba kini o venganza?  Kon adunay political will, dako ang mahimo sa kagamhanan alang sa kaayohan.  Makapahinumdum sa ulohan sa drama nga nagkanayon, “Kon Mosukol na ang Dinaug-daug”.  Kumbati pa!

Sayop ba kaha ang pamaagi?

Matud pa sa Presidente sa PHAPI, kasagaran sa mga hospital sa Metro Manila, Cebu City ug Iloilo hapit na mapupos ang kapasidad sa pag-atiman sa mga nasakit sa COVID-19.  Kapin sa upat ka buwan na ang pakigbatok sa virus apan nagkadaghan man ang nataptan sa sakit. Sukwahi kini sa pagkunhod sa kaso sa ubang nasud.  Pinangga ba kita sa COVID o dunay sayop sa atong pamaagi pagbatok niini?  Dunay panultihon nga “Hinanggaw ang pagbuhat sa usa ka butang sa balik-balik o sama gihapon’g paagi unya maghandum sa lahi nga sangputanan”. Pagkatoytoy!

Mahal na lakip ang kamatayon

Aduna’y girekomendar nga lain’g luna nga maoy himoong bag-ong sementeryo sa dakbayan sa Sugbo nga nahimutang sa Sitio Baksan, Barangay Pamut-an.  Gibalibaran sa DENR ang unang gitumbok nga lugar sa Barangay Guba tungod sa mga kalapasan niini.  Hinaut nga pinaagi sa maong proyekto, mogaan na ang galastuhan sa pagpalubong alang sa mga Sugbuanon kay malisod na gani uyamot ang panginabuhi ug pagpakabuhi, lisod-lisoron pa gyud ang pagpahiluna sa patay.  Mahal na gani ang “cost of living, mahal pa jud ang “cost of dying”. Saoonz!

Ayaw ipasuyop sa lamok

Mopahigayon ang kagamhanan sa dakbayan sa Lapu-lapu City og usa ka blood donation drive agi ug pagsanong sa dakong panginahanglan karon sa red blood cells ug plasma.  Pagapangulohan sa mayor ang maong kalihokan.  Bulawanon ang maong proyekto.  Matud pa bitaw sa panultihon, “Ihatag sa uban ang imong dugo aron mapuslan kini ingon man makasalbar og kinabuhi. Ayaw itugot nga mga hanggaw ug mga lamok lamang ang mosuyop niini”.  Baya no!

Pagtu-is sa kamatuoran

Gikataho nga si Wesley Ira Purkey, ang tawo nga gihukman sa kamatayon pinaagi sa lethal injection nga gikatakda nga ipahamtang karong semanaha didto sa U.S. Penitentiary sa Terre Haute, Indiana, aduna pa’y kahigayonan nga makalingkawas sa silot. Matud pa sa mga legal experts, aduna siya’y sakit nga ‘dementia’ ug tungod niini dili kuno niya masabtan ang rason ngano nga pahamtangan siya sa kamatayon.  Mao ba kini giingon ni Albert Einsten nga “Kon ang kamatuoran dili motakdo sa imong teoriya kon panahom, ilisdi ang kamatuoran”? Fezteleern!