EDITORYAL - Malapason angay silotan

Aron mapatuman gyud kining mga health protocols sa tanang oras, kinahanglang seryosohon sa mga lokal nga mga kagamhanan ang higpit nga pagpasunod niini sa katawhan.

Ang novel coronavirus dili na gyud mawagtang pa sa kalibotan, bisan og aduna nay bakuna nga madiskubrehan batok niini magpabilin kining hulga para sa tanan.

Apan dili sundon sa mga tawo ang health protocols kun wala sila maanad niini ug mahitabo lang kini kun ang mga LGUs gikan sa lungsod, siyudad hangtud sa barangay seryusong mopasunod niini sa mga konstituwente.

Mga ordinansa ang gikinahanglan para kini mapatuman og tarong. Kay dili ikalimod, duna gyuy mga tawong magpasagad sa ilang panglawas ug walay pagpakabana sa uban.

Ang DILG misugyot nga ipapriso gyud kadtong mga makalapas sa health protocols. Ambot kun sobra ra ba kini kaayo o kuwang pa nga silot.

Apan mas maayong adunay silot nga ipahamtang niadtong mga malapason aron dili na mag-usab  ug dili sundon sa uban.

Sa mapasar nga mga ordinansa dako og papel o responsibilidad ang mga lokal nga mga opisyales.

Sila maoy mosiguro nga dili magkatinakdanay ang mga tawo sa COVID-19 diha sa ilang mga dapit.

Angay iapil niini ang pagdili na sa mga estambay diha sa kadalanan ug pagpatuman og makatarunganong curfew para sa tanan.

Dili lang ang pagtakodtakod sa COVID-19 ang mapakgang niini  kay epektibo sab kining pamaagi batok sa mga krimen diha sa komunidad.

Kadtong mga magpabaya sa ilang katungdanan kun pananglitan adunay outbreak nga mahitabo sa ilang lugar, sila maoy pasakaan og kasong administratiba ug kun itugot sa kasamtangang mga balaod ug depende sa gibug-aton sa resulta sa ilang pagpasagad, sila maoy ipapriso.

Anhi sab makita kun unsa sila ka maayo o walay ayo ang naglingkod nga lokal nga opisyal. Diha masukod kun angayan pa ba silang botaran sa sunod.

Ang mga balaod lakip na mga ordinansa gikinahanglan aron mahusay ang katilingban. Kon ang tanan nalang magbuot ug maghawod-hawod, gubot ang padulngan.