EDITORYAL - Pabadlong tungatunga sa COVID-19 outbreak

Usahay dili mabasol kun nganong sawayon sa publiko kining ubang mga opisyales sa gobiyerno sa ilang mga gipangbuhat ilabi na niining panahon sa hulga niining novel coronavirus (COVID-19).

Ang salawayon nilang buhat mao kining ilang pagkawalay pagbati ngadto sa mga kabus nga mao karoy labaw nga nagrabehan sa epekto sa gipatumang enhanced quarantine ug uban pang paghigpit aron lang di mokatap ug makatakod og daghang mga Pilipino ang virus.

Sa pagsugod palang ani nga krisis, ang Department of Health mipahibalo ng daan nga kuwang gyud og COVID19 test kits dinhi sa nasud.

Tungod niini, dunay gipatumang guidelines sa kung kinsa lang ang ipaubos sa test kits, kadto rang dunay mga grabeng gipakitang sintomas sa COVID-19 nga nakabiyahe gikan sa mga nasud nga dunay kompirmadong COVID19.

Misabot ang mga tawo sa guidelines bisan kadtong na-exposed sa mga kompirmadong dunay COVID-19  nagpaubos nalang sa ilang kaugalingon sa 14 ka adlaw nga home-quarantine samtang wa pay test kits.

Nakasabot gyud ang mga yanong Pilipino nga kinahanglang unahon ang mga labing nagkinahanglan kay lagi, nihit kaayo ang supply sa test kits ug labaw sa tanan mahal kini.

Apan unsa bang pagka unsaha nga dunay mga senador ug duna pa tingali uban nga mga inilang mga tawo, ilang mga anak ug mga kabanay ang nakapaubos man sa COVID-19 test.

Nagsunod ba kaha ani ang guidelines sa kun kinsa ang maka-avail sa COVID-19 test kits?

Ang mga dili inilang tawo mag-antos una dalang pag-ampo nga ordinaryong ubo, pagaw ug sip-on lang ilang sakit kay di man sila makagamit anang COVID-19 testing kits. Karon nangabot-abot naman ang mga test kits ug gibuksan na sab ang uban pang mga accredited testing laboratories sa nagkadaiyang dagkong mga tambalanan sa nasud.

Maayo unta og madugangan pa kini aron usab dili na maabot sa puntong mograbe na ang pasyenteng persons under investigation ayha pa sutaon kun COVID-19 ang nitakboy kanila.