Hagit sa simbahan pag-atiman sa mga kabos

Usa ka higayon niana, atubangan sa mga apostoles nangutana si Hesus: “Pedro, gihigugma mo ba Ko?” Katulo gyod pangutan-a si Pedro ni Hesus. Ug katulo sab tubaga ni Pedro og: “Oo, Ginoo, sayod ka gayod nga gihigugma ko Ikaw.”

“Kun mao, pakan-a ug atimana akong mga karnero.” Sugo-tugon ni Hesus kang Pedro nga katulo pod balikbalikag sulti.  Unya sa laing higayon, Siya namulong: “Ug karon nag-ingon ko. Ikaw si Pedro (o Bato). Ug niining batoha, tukoron ko ang akong Simbahan.”

Tuod man, natukod ang St. Peter’s Basilica sa Vatican City, Italy, Rome, diin si Pedro maoy nahimong unang Santo Papa ug Santos. Sa iyang pagkamatay, gipadayon sa misunod nga mga Santo Papa ug kaparian ang hagit sa simbahan nga pag-atiman sa mga kabos.

Sama sa gibiling mga dalaygong tunob ni anhing Bishop Teofilo Camomot, diin tungod sa iyang dakong gugma ug kaluoy ngadto sa katawhan, kutob sa unsay anaa kaniya nga gikinahanglan sa mga kabos, bahala nag walay mahabilin kaniya, kining tanan, kinasingkasing niyang gihatag.

Sa mga relics nga iyang gitugyan ug gitipigan sa Daughters of Santa Teresa’s sisters didto sa Valladolid, Carcar City, gikan sa iyang katreng hinimo sa baratohong kahoy hangtod na sa mga sotanang igsusul-ob, ang gagmayng buslot sa pipila niini, buhing makatug-an nga wala puy-i ni Bishop Camomot ang kaluho sa kinabuhi, kondili, iyang gibuhos ang kaluho sa iyang pagpangalagad ug pag-atiman sa nag-antos mga kabos, kinsa biktima sa inhustisya, pangdaogdaog ug kawad-on. Ning atong panahon nga ang katawhan, naadik na sa selpon, i-phone, computer ug uban pang gadget, daghan nang wala makatultol sa simbahan. Ug binilyong linalang ang wala na makailag Ginoo.

Gani, bisan pa ning makalilisang pagpanghasi sa killer-corona virus (Covid-19) sa tibuok kalibotan, diin wala pay tambal nga makaayo, daghan gihapon ang pabiling naglunang sa kasal-anan. Ug wala magpakabana ning pagpanguhit sa atong Manluluwas nga nag-awhag sa tanang gahi nga magbag-o na sa ilang kinabuhi.

Sila ang mga kabos sa pagtuo, ang karnerong gibilin ni Hesus ngadtong Pedro. Sila nahisalaag. Nawala! Ug maoy dakong hagit sa simbahan unsaon sila pag-agak sa hustong dalan aron mahatipon pagbalik sa mga buotang karnero. Kaya ba, Fathers?