Paburot sa ginansiya sa tambal
Upat ka buwan nang nagung-ong sa buhatan ni Presidente Rodrigo Duterte ang listahan sa 120 ka tambal nga angay’ng laslasan ang presyo. Septiyembre pa sa niaging tuig nga gisumiter sa Department of Health (DOH) ang draft sa executive order nga mopabarato sa mga tambal batok sa labing grabeng mga sakit.
Apan dihang gipangutana sa ABS-CBN News si Presidente Duterte napirmahan na ba niya ang dokumento, nibalibad siya nga wa pang kabasa ini. Nipasalig hinuon nga kon makaabot na sa iyang lamesa pirmahan dayon ni niya. Bisan kaduha pa.
* * *
Katapusang higayon nga nipasalig ang presidente sa pagpirma dayon nisangpot sa pagkabasura sa balaudnon sa Endo, nga motapos na unta sa ilegal nga kontraktuwalisasyon, bisan iyang gi-apura ang Kongreso pinaagi sa pag-certify ini nga urgent.
Niadtong higayona, nibalitok ang baruganan sa presidente tungod sa gamhanang lobby sa labing dagko nga mga negosyante sa nasud. Ning higayona, hinaot nga ang kalangay wa manukad sa kusganon nga pagsupak sa Pharmaceutical and Healthcare Association of the Philippines.
* * *
Dinalian ang panginahanglan paglaslas sa presyo sa mga tambal sa hypertension, diabetes, cardiovascular disease, chronic lung diseases, neonatal diseases, cancers, chronic renal disease, psoriasis ug rheumatoid arthritis.
Dugay na ning giduso sa mga eksperto sa epidemiology, clinical medicine, economics, law, drug policy ug competition policy ubos sa Drug Price Advisory Council nga gitukod ni Presidente Duterte niadtong Agosto 2018.
* * *
Makapakugang ang sangpotanan sa pagtuon sa DOH nga usa sa gipasikaran sa ilang rekomendasyon sa pagpahamtang sa maximum drug retail prices (MDRP) alang sa dugang 120 ka tambal, pahiuyon sa Cheaper Medicines Act sa 2008 (Republic Act 9502).
Samtang padayon nga nitibugsok ang presyo sa mga tambal sa ubang kanasuran, ug ambot tungod ba sa mga pasangil nga nagbaha ang mga suburno sa higanteng mga kompaniya aron ipamugos sa mga doktor, mga tambalanan ug mga botika ang ilang mga tambal o nagpatuyang lang gyod pagpaburot sa ilang ginansiya, nalansang ang tag-as nga presyo sa Pilipinas:
• Mas taas og hangtod sa 400% ang presyo sa generic drugs dinhi sa ato; ug
• Mas taas og hangtod sa 2,200% ang presyo sa branded products labi na sa pribadong mga tambalanan ug mga botika.
* * *
- Latest
