Tuig 2020

Milabay na ang tuig 2019 ug ato na usab nga sination ang unsa man nga mga panghitabo sa lain na usab nga 365 ka adlaw ning tuig 2020.

Sigun sa Chinese Zodiac ang tuig 2020 mao ang tuig sa ilaga ug gikaparis niini ang elemento nga metal busa ang tuig 2020 mao ang tuig sa metal Rat.

Ang ilaga mao ang pinaka-una sa tanang zodiac animals.

Sa mga Insik ang ilaga nagsimbolo og sinugdanan sa bagong adlaw ug sa ilang kultura ila kining nakita nga senyales sa bahandi ug sobra nga bahandi. Tungod sa reproduction rate sa mga ilaga adunay mga magtiayon nga nangayo kanila og bata.

Ang ilaga gihulagway nga listo, dali nga makahuna-huna, malampuson apan kontento sa pagpuyo sa malinawon nila nga kinabuhi.

Ang mga tawo nga natawo sa tuig sa metal Rat aduna kini personalidad ug hiyas nga malaumon, liksi ug mauyonan sa tanan. Sensitibo sila sa pagbati sa uban pero gahi sa ilang panahom.

Ang ilang personalidad maayo pero tungod kay dili sila hanas sa komunikasyon ang mga pulong nga mogawas sa ilang baba bastos.

Sa aspetong panalapi ang mga tawong natawo sa metal Rat mahilig magtigum ug kuripot apan ang ilang pagkamahiligon magtigom usahay maoy hinungdan sa pagwaldas ug paggasto sa ilang salapi sa mga butang nga walay hinungdan.

Ang panagna sa mga Insik magdepende sa pagdala nato sa tagsa-tagsa nato ka mga kinabuhi.

Ang matang sa pagpuyo ug matang sa panginabuhi nga gusto natong poy-an dili puyde nga isalig lamang sa mga panagna. Kun unsa man nga matang sa kinabuhi ang imong poy-an magdepende kini sa imong kayod ug paningkamot ug walay mga panagna nga makadiktar o makabuot sa kinabuhi nga gusto nimong puy-an.

Kaninyong tanan maayong Bag-ong Tuig ug mauswagon nga tuig 2020.