Awop nga dan-ag sa paglaom
Dihang nibaha na sa mga tindahan ug gihurot sa tumang kahinangop sa mga mamalitay ang de kolor nga TV sets, nangagpas dayon ang nangangkon nga mga eksperto sa media nga inihap na lang ang mga adlaw sa radyo.
Maong naghimo dayon og survey ang British Broadcasting Corporation (BBC), ang kinadak-an nga network sa radyo niadtong higayona, sa mga bata sa Britanya:
Maminaw pa ba sila sa radyo nga labihan na man kaklaro ug katahom sa mga pasundayag sa telebisyon? Nakugang ang mga tigpasiugda sa survey sa tubag sa mga bata.
* * *
Alang sa mga bata, bisan mas nindot tan-awon ang de kolor kay sa karaang itom ug puti nga telebisyon, mas tin-aw gihapon ang mga hulagway nga ilang makuha gikan sa radyo.
Kay gawasnon silang mopahaom og mga hulagway sa mga tingog, awit ug kasikas nga ilang mabati sa radyo.
Ang survey pila ka dekada nang nilabay maoy nakabuhi sa dugo namong taga radyo matag gawas sa bag-ong mga pasidaan sa among pagkahanaw. Labi na sa padayong pagpanghawod sa social media nga nihulga na bisan sa telebisyon nga unang nihulga sa radyo.
* * *
Nahinumdom sab ko sa survey samtang naminaw sa mga awit sa mga bata nga napawongan sa kahayag atol sa Christmas party sa Cebu Braille Center sud sa Cebu Normal University niadtong Huwebes.
Puno sa pangilaba ang ilang mga tingog. Hinukad sa kinauyokan nga bahin sa ilang kasingkasing nga paminawon sila ug hatagan og luna sa katilingban. Bisan sa makalilisang nga kakulian, diin man gikan ang way pagkapawong nga panlimbasog sa pagpadayag sa ilang kaugalingon?
* * *
Gamhanan gyod tingali ang mga hulagway nga nakuha sa mga bata gikan sa mga tingog sa karaang radyo nga karong ang internet nay nag-unang tinubdan sa tingog, awit ug kasikas sa tanang suok sa kalibotan ang mga nagpuyo sa kangiob padayong nakalili sa iwag sa paglahutay.
Dako og tampo ang way kinutobang gugma ug pagmatuto sa mga ginikanan, magtutudlo ug tagduma sa Cebu Braille Center.
Nga nagkinahanglan og dinaliang tabang aron kahatagan ang matag batang may kakulian sa mata sa tanang kahigayonan pagkat-on ug pagsangyaw sa ilang tingog ug awit gikan sa mga hulagway sa gamhanang panglantaw sa ilang hunahuna.
* * *
- Latest
