EDITORYAL - Makaayo ang fishing ban

Lisud pa gyud pasabton kining pipila ka mga pundok kung unsa ka importante ug kun unsay kaayohang makuha sa tinuig nga fishing ban sa pipila ka matang sa mga isda nga makuha sa kadagatan sa nasud.

Kaning mga pundok nga nangangkon kahugpongan sa mga gagmay nga mga mananagat mireklamo sa gipatumang galunggong fishing ban sa Bureau of Fisheries and Aquatic Resources nga gisugdan kagahapon Nobiyembre hangtud na sa Enero 31 sa sunod tuig.

Ang maong ban ikalima na ka tuig gipatuman sukad nga naamendahan ang Fishery Code of the Philippines.

Ang ban gipatuman kini sa nagkadaiyang mga rehiyon sa tinguha sa BFAR nga mahatagan og panahon ang mga hamtong na nga mga galunggong(budboron) aron makapangitlog ug mosanay.

Pinaagi nini masiguro nga dunay mga bag-ong semilya sa mga budboron nga managko sab aron sa pagkasunod bulan sa Nobiyembre sa sunod tuig andam na sab sila mosunod sa mangitlog.

Matud pa sa grupo sa mga militanteng pundok nga nangangkong representante sa mga gagmay nga mga mananagat dili makiangayon ang fishing ban kay giabusaran lang kini sa mga dagkong panagatan ug wala say positibong resulta kondili nakadugang lang sa kalisod sa mga gagmay nga mga panagatan.

Makalibog kining ubang mga pundok tungod kay wala nay laing gibuhat ang gobiyerno nga tarong para nila.

Kaniadto sa karaang Philippine Fishery Code of 1998( R.A. 8550)  nagsige sila og reklamo tungod kay nagnihit na ang mga isdang makuha diha sa duol sa baybayon ang mga gagmay nga mananagat ug daghan ang mga commercial fishing nga wala makontrol.

Apan dihang giamendahan ang maong balaod ug napasar ang RA 10654 ug gipahugtan ang pagpatuman sa balaod sa panagatan sama sa unregulated, unregistered, unreported ug illegal fishing ug gipatuman sab ang seasonal fishing ban, nagsige ra gihapon sila og reklamo.

Dili ba mahimong imbes moreklamo mokooperar nalang ug motabang sa hugot nga pagbantay aron makabenepisyo ang mga gagmay nga mananagat gikan niining fishing ban?