Modernong transportasyon

Sa miaging Huwebes gilusad sa Land Transportation Franchising and Regulatory Board dinhi sa Central Visayas ang Public Utility Vehicle Modernization Program pinaagi sa paghatag og privisional franchise sa dul-an sa 300 ka mga modernong sakyanan. Kini naglakip sa mga modernong taxi, buses ug electronic jeepneys. Ang maong mga modernong sakyanan dunay libre nga serbisyo sa Wi-Fi, CCTV, ug pre-payment system alang sa mas hapsay nga pagkolekta sa plete.

Duna say kaugalingon nga kasilyas ang pipila sa mga bus. Ang pangulo sa Office of the Presidential Assistant for the Visayas nga si Secretary Mike Dino mihulagway niini nga maoy sinugdanan sa “golden age” sa public transportation dinhi sa Sugbo ug sa tunga-tungang kabisay-an. Way lalis nga nindot ang moderno nga mga sakyanan. Apan dili ni maoy tubag sa nag-unang problema sa trapiko dinhi sa Metro Cebu.

Hinuon mas nadugangan ang gidaghanon sa mga sakyanan sa kadalanan tungod kay nagpabilin pa mang gitugotan nga makabiyahe ang mga karaan nga PUJ.

Mas maayong idungan sa LTFRB ang pagwagtang sa mga PUJ og hulipan niining mga moderno nga electronic jeepneys.

Mas dako ang capacity ug mas limpiyo. Kun mas daghang pasahero ang makarga mas minus ang sakyanan nga magdagan sa karsada ug mas luag ang trapiko.

Panahon na gyud sa pagpatuman sa modernisasyon sa transportasyon tungod kay gibiyaan na ta sa ubang dapit sa kalibutan. Sa miaging tulo ka semana didto ko sa China alang sa usa ka journalism training nga gipasiugdahan sa China Ministry of Commerce pinaagi sa China International Publishing Group.

Didto imong makita giunsa sa mga insik pagpalambo ang ilang transportasyon.

Alang sa usa ka higanteng nasud nga dunay population nga 1.4 bilyones, imong ma-imagine ang dakong suliran sa trapiko.

Apan ang tinuod mas ngil-ad ang sitwasyon sa trapiko dinhi sa ato kun itandi sa ilang dapit. Kini tungod kay mas gihatagan og bili sa ilang gobyerno ang mass transportation. Way PUJ sa China, Bus Rapid Transit (BRT) ug subway train maoy nag-una nilang transportasyon. Dunay taxi apan mas daghan ang mogamit sa subway tungod kay mas barato ug way problema sa trapiko.

Labihan ka efficient sa ilang transportation system. Kun makumpleto ang pagpatuman sa PUV modernization dinhi sa Metro Cebu, mas hamugaway ug hapsay ang dagan sa trapiko tungod kay mahanaw ang paugat nga mga driver sa PUJ diha sa kadalanan.