Bangis nga tulis sa bugas

Ang maayong balita mao ang pagtidlom sa presyo sa bugas humay tungod sa gawasnong importasyon. Nga maoy gipasalig sa Rice Tarrification Law.

Wa pa hinuon matinuod ang pasalig sa economic managers ni Presidente Rodrigo Duterte nga motidlom og P7 matag kilo ang presyo sa commercial rice.

Pagtak-op sa Hunyo, sigun sa Philippine Statistics Authority (PSA), ni-us-os ang presyo sa well-milled rice ngadto sa P39.30 matag kilo kon itandi sa P41.58 matag kilo sa samang higayon sa niaging tuig; ug ang regular-milled rice nahimong P35.39 matag kilo gikan sa P38.56 matag kilo.

* * *

Apan di pa angayng magsaulog ang mga konsumidor. Kay nahibaw-an sa Federation of Free Farmers (FFF) nga gipaburot sa mga negosyante sa bugas humay ang ilang ginansiya ginamit ang dakong buslot sa bag-ong balaod:

• Gipahiyos nila pag-ayo ang presyo sa imported nga bugas humay sa pagdunggo sa atong mga pantalan aron nga malaslasan ang buhis nga ilang gibayad sa Bureau of Customs (BOC); ug

• Gipasakaan pag-ayo ang presyo sa bugas humay nga ilang gipabaha sa mga tindahan ug kamerkadohan ug giulug-ulogan lang og gamayng laslas ang mga konsumidor.

* * *

Mao ning kuwentada sa FFF:

• Gideklarar sa mga negosyante nga ang ilang imported rice tag $227 (P11,804) matag tonelada, mas ubos kay sa banabana sa United Nations Food and Agriculture Organization (FAO) nga $391 (P20,332); mao nga

• Ang buhis nga ilang gibayad sa BOC sa 1.43 ka tonelada nga importasyon niabot lang og P5.9 bilyones, sa ato pa, naalkanse ang gobyerno og P4.24 bilyones kun gitug-an pa ang tinuod nga presyo.

* * *

Matud sa FFF, kon paundayonan ang pangangkon sa mga negosyante nga tag $227 (P11,804) ra ang matag tonelada sa ilang imported rice, ang ilang puhonan mokabat lang og P17.30 matag kilo. Kun itandi sa gilista sa PSA nga presyo sa well-milled rice, P22 matag kilo ang patong sa mga negosyante.

Ang mga negosyante, gawas nga nitulis sa atubangan sa gobyerno ug mga konsumidor, nihikaw pa gyod sa mga mag-uuma sa gisaad nga tabang pinaagi sa Rice Competitiveness Enhancement Fund (RCEF).

Nga, kon di matapakan ang buslot sa Rice Tarrification Law, mahimong di kaabot og P10 bilyones karong tuiga.

* * *

[email protected]