Uhaw sa huwaw

Dili lang diay sa Manila nagkabuang ang mga tawo sa kawalay supply sa tubig kondili nahitabo na usab kini sa dakbayan sa Sugbo.

Kagahapong adlawa lang taas kaayo ang linya sa mga tawo nga naghulat sa rasyon sa tubig gikan sa Metro Cebu Water District (MCWD).

Ang Barangay Sambag 1 ug Sambag 2 ang girasyonan og tubig nga gikuninitan pud dayon sa mga konsumidor.

Arang-arang kadtong anaa daplin sa karsada kay duol ra apan kadtong sudlonon aw magsakripisyo gyud pagdala sa ilang mga container padung sa ilang mga pinuy-anan.

Unang higayon nga nakasaksi ako og talan-awon sa mga tawo nga grabe gyud ang panginahanglan sa tubig.

Kutob sa mga butang nga kasudlan sa tubig ila gyud gigamit nga murag nahangol hangol sa tubig, hinoon dili ta kabasol kay dugay na silang nag-antos tungod kay walay agas ang ilang mga gripo.

Matud pa sa mga molupyo nga unang higayon nga nakasinati sila og hataas nga pagka uga sa ilang tubig.

Ingon nila nga mas maayo pang walay kuryente basta naa lay tubig kay mangabaho gyud ang mga tawo kon dili makaligo.

Dinhi nato makita kun unsa ka mahinungdanon ang tubig sa atong kinabuhi nga makaingon kita nga ang tubig kinabuhi gyud.

Karon pa lang nga ingon na ini ang problema sa tubig unsa na kaha kun molanat pa kini og pipila ka buwan nga dili ra ba layo ang posibilidad.

Walay gipili ma bukid man o ma patag apektado sa huwaw nga nimugna na karon og kauhaw sa mga tawo o sa tanang mga living things nga nagsalig sa tubig.

Panahon nang magdaginot sa tubig kay nakita na nato ang kamatooran, seguro ang uban ibalewala lang ang awhag hangtod nga sila na gyud ang maapektohan.

Nihubas na ang Buhisan dam ug mosunod na usab ang Jaclupan dam nga mao ra ang mga surface water sources.

Gisaligan karon sa MCWD ang ground water source apan bisan og anaa pay makuha nga tubig dili gihapon kasaligan posibleng mohubas usab ang tinubdan.