Pahaba

Atol sa pagduaw ni Presidente Rodrigo Duterte dinhi sa Sugbo niadtong Martes nag-iyahay kuno og pahaba ang mga kontra sa politika ni Mayor Tomas Osmeña.

Ang kasaligang tinubdan sa The Freeman nga didto sa usa sa mga pribadong tigom uban sa presidente miingon nga labihan sukoa ni Duterte dihang nahibawo sa hulga ni Osmeña nga dili na moabaga ang dakbayan sa pagparehistro ug pag-ayo sa mga sakyanan nga gigamit sa kapolisan.

Nisumbong kuno ang mga opisyal sa kapolisan uban sa mga kontra sa politika sa mayor.

Tungod sa kasuko ni Duterte nanglupad ang balikas uban ang bahad. Ambot kinsay didto atol sa maong tigom, apan dunay hulagway nga gipakita si kanhi mayor Michael Rama diha sa Facebook uban niya ang presidente.

Hinaut dili siya apil sa mga nagpahaba sa presidente. Salikwaot sab kaayo ang pagtugot sa presidente nga makigtupad sa hulagway uban ni Rama.

Wala pa tingali makalimot ang presidente nga si Rama usa sa iyang mga gipasanginlan nga drug protector. Dili ba salikwaot tan-awon nga ang namasangil nakig-uban sa hulagway sa iyang gipasanginlan?

Hangtud karon wala pa baya bakwia ni Duterte ang iyang pasangil batok ni Rama. Kon di magbantay si Duterte sa mga tawo nga mopaduol niya mamahimong maapektuhan ang kredibilidad sa iyang kampanya.

Mamahimong wa ni kahulogan tungod kay unsa may naa sa hulagway. Apan angayan niyang hinumduman nga hulagway baya ang usa sa ilang gibasihan aron iduot si Senador Leila de Lima.

Nakalimot na ba siya nga usa sa ilang gipresentar nga ibidensiya pagmatuod nga protektor si de Lima sa drugas mao ang iyang hulagway uban ni Kerwin Espinosa didto sa Baguio?