Nganong laktud ug bangis
Nagsugod ning tanan ni Senador Leila de Lima nga kon wa pa maapsi sa kahigayonan nga nakatabang siya sa pagmugna, mao unta karon ang naglingkod nga pangulo sa Korte Suprema inay nga magtingkagol sa bilanggoan.
O tingali, nagsugod kini ni kanhi Presidente Noynoy Aquino, ug sa iyang dakong tinguha pagtarong sa mga institusyon nga namantsahan sa lang-og nga pangurakot sa iyang gisundang pamunoan.
Nadapit siya sa talagsaong kaisog ug katakus ni De Lima pagpugong sa paglayas ni kanhi Presidente Gloria Macapagal-Arroyo. Apan ang samang kaisog nigapos niya pagtudlo ni De Lima sa labaw’ng hukmanan.
* * *
Si Chief Justice Maria Lourdes Sereno napiskan lang sa ilang atraso kay siya ra ang nalingian ni Aquino dihang nasangit ang nominasyon ni De Lima sa Judicial and Bar Council (JBC) nga ubos sa mga lagda, dili maduso ang iyang ngalan ngadto sa Malakanyang kay nag-atubang siya og kaso.
Ang kaso gipasaka sa kampo ni Arroyo nga naghupo sa tukmang higayon kon kanus-a makabawos ni De Lima tungod sa pagbabag ni Arroyo didto sa Ninoy Aquino International Airport (NAIA) bisan og may pagtugot na gikan sa Korte Suprema pinaagi ni anhing Chief Justice Renato Corona nga makalarga sa gawas sa nasud.
* * *
Mahimong si Sereno wa mahibawo unsa’y nakaigo niya. Mahimong bisan siya wa hingpit nga makatugkad nga aksidente ra ang pagkadawat niya sa dakong ganti nga alang gyud unta ni De Lima.
Ang mga mahistrado nga nag-una niya sa duyan, gawas nga nahimangod nga iyang nalaktawan, nisamot pag-ulbo dihang ilang nahibaw-an nga wa gyud gani diay kaila si Aquino niya. Wa sab makatabang ang kakuwang sa iyang statements of assets, liabilities and net worth (SALNs).
* * *
Nganong, bisan sa kasibaw ug kalapad sa mga protesta sa mabuot nga mga hut-ong sa katilingban, bangis ug laktud ang pagpalagpot ni Sereno sa katungdanan? Mahimong tungod sa panagkonsabo sa mosunod:
Kampo ni Arroyo nga maoy tinuod nga nagkontrolar sa mayoriya sa mga mahistrado nga niisip ni Sereno nga maoy tinuod nga nakapahimus sa grasya nga alang unta sa mortal nilang kaaway nga si De Lima; ug
Pamunoan ni Presidente Rodrigo Duterte nga wa pa mahuman pagnudnod sa kampo ni Aquino busa nihangop sa tanang kahigayonan pakig-alyansa nilang Arroyo ug ubang mga nayatakan sa napulihan nga pamunoan.
* * *
- Latest
