Misteryo sa pagkamatay ni Mayor Espinosa

Daghang misteryo angay hubaron sa pagkamatay ni Albuera, Leyte Mayor Rolando Espinosa sulod sa iyang selda sa Leyte Provincial Jail. Ang mga balita nagkanayon nga misukol si Espinosa sa mga sakop sa Criminal Investigation and Detection Group (CIDG-8) samtang nag-serve og search warrant.

Laing inmate sulod sa buwag nga selda nga si Raul Yap napatay usab sa hitabo.

Dili mo makamahay nako kun mokuyog ko sa pagtuo sa uban nga kuwestiyonable ang pagkamatay ni Espinosa sulod sa selda. Mismo si Senador Ping Lacson nagtuo nga biktima sa “extrajudicial killing” si Espinosa.

Bahala na’g mosaway mo nako kun moingon kong wala ko mahinugni sa kinabuhi ni Espinosa tungod sa liboan ka kinabuhing iyang giguba tungod sa iyang negosyo. Apan ang akong kuwestiyon nagpunting kun kinsa ang tawo o grupo nga nagpapatay kang Espinosa.

Si Espinosa miluwat og pinanumpaan nga affidavit nga naglambigit sa dagkong isda sa negosyo sa drugas nga naglakip sa usa ka cabinet secretary, mga heneral sa kapolisan ug militar, mga huwes, ug mga sakop sa media.

Nagduda ang mga tawo nga tungod sa affidavit ni Espinosa mauyog ang mga nahibiling personalidad sa sindikato sa drugas sa nasud. Ug nagtuo sila nga mao kini gipasanginlan nga hulga sa kinabuhi sa mayor sa Albuera hangtod mitahan kini kang Heneral Bato dela Rosa.

Ang Philippine National Police mimando na og halapad nga imbestigasyon. Angayan nilang sutaon kun tinuod ba nga adunay mga armas silang Espinosa ug Yap ug kun nagnegosyo pa ba gihapon kini og drugas sulod sa prisohan. Manubag sa imbestigasyon ang jail warden ug mga jail guards.

Angay usab sutaon kun gi-authorize ba ang operasyon sa CIDG-8 ug nganong wala sila makig-coordinate sa Police Regional Office-8 ug sa jail warden.

Laing pangutana nganong gisakmit man sa mga operatiba sa CIDG-8 ang CCTV video sa jail. Unsaon man pagmatuod sa mga operatiba sa CIDG-8 nga nanguna og pabuto si Espinosa ug Yap kun dili nila mapakita ang aktuwal nga “firefight” sulod sa selda? Kun ini’g uli nila sa CCTV na-delete na ang video, makatuo pa kaha kita sa kalehitimo sa operasyon sa CIDG-8?

Makadaghan na kita makakita og salida mahitungod sa mga “conspiracy theory” busa mahadlok kita nga gitipi si Espinosa aron wala nay momatuod sa korte sa gipanumpaan niyang affidavit.  Ang affidavit ni Mayor Espinosa wala nay silbe kay patay na man siya ug dili na makamatuod sa iyang gipanumpaan didto sa korte.

Hinuon, aduna pay alas nga gigunitan ang gobiyerno kay ang anak ni Espinosa nga si Kerwin atoa pa man sa Abu Dhabi. Ini’g pauli ni Kerwin dinhi sa Pilipinas, moalegre na usab kita og balik kay ipangsabwag na usab ang mga personalidad nga apil sa sindikato sa drugas dinhi sa atong nasud.

Hulata na lang ninyo si Kerwin!