Paglawom sa misteryo
Atubangan sa sibaw nga mga pasangil nga ilang gituyo pagpatay si Albuera Mayor Rolando Espinosa Sr. aron di nang kabarog ang iyang paglambigit sa mas dagkong politiko ug opisyal sa kapolisan sa ilang negosyo sa ilegal nga drugas nga giduma sa gipasanginlang drug lord sa Eastern Visayas nga si Kerwin Espinosa, nisumbalik pagpasangil ang pangu sa 20 ka operatiba sa Criminal Investigation and Detection Group (CIDG) 8, si Chief Inspector Leo Laraga:
Nga ang jail guards kakunsabo sa paghupot ni Espinosa og armas ug ilegal nga drugas sa iyang selda sa Leyte Sub-Provincial Jail sa Baybay City; ug nga nakapangandam silang Espinosa ug ang laing piniriso nga si Raul Yap pakigpinusilay nila kay tungod sa pagbabag sa jail guards naabtan sila og 20 ka gutlo una nakasud sa prisohan.
* * *
Mao ni panagang ni Laraga sa gitakdang imbestigasyon sa Internal Affairs Service (IAS) sa Philippine National Police (PNP), sa tinuyong pakisusi nga gimando ni PNP Director General Bato dela Rosa ug sa giawhag ni Senador Panfilo Lacson nga pag-abli pagbalik sa imbestigasyon sa Senado sa extrajudicial killings (EJKs).
Nisuway pa si Laraga sa pagtugkad sa kahimtang sa panghunahuna ni Espinosa nga nakaaghat niya pagsukol sa kapolisan: Mahimong tinuod g’yung nahadlok si Espinosa sa iyang seguridad maong niawhag nga ibalik sa kustodiya sa kapolisan, nipayuhot sa Super .38 kalibre nga armas sa iyang selda ug dihang nakabantay sa operasyon sa kaadlawong dako wa managana sa pag-una og pabuto.
* * *
Masaligon si Laraga nga nasubay sa mga lagda sa pagsilbi sa search warrants ang duguon nilang operasyon:
Gilungkab nila ang ganghaan sa prisohan dihang gitalikdan sila sa guwardiya human nakabasa sa gida nilang warrants batok nilang Espinosa ug Yap;
Niposisyon ug nangandam sila sa posibleng pinusilay batok sa mga guwardiya nga ila nang gidudahan nga kakonsabo ni Espinosa;
Dihang nagdumili pagsukol tungod tingali sa kadaghan nilang nagbitbit og tag-as nga mga armas, gidis-armahan nila ang tanang jail guards ug gipaatubang sa bungbong; ug igo lang silang nibawos dihang unang nipabuto si Espinosa human natandangi sa ilang suga nga nagpahipi sa kabinet sa iyang selda.
* * *
Masaligon si Laraga nga ang tanan nilang gihimo atol sa operasyon masubay sa mga imbestigador pinaagi sa closed-circuit television (CCTV) sa prisohan. Sa akong pagsuwat ini, wa pa hinuon igkita ang footage. Segun ni Leyte Provincial Administrator Atty. Edgardo Cordeño, nga mao untay nagduma sa dinaliang pakisusi nga gimando sa Kapitolyo sa Tacloban City, nawagtang nang hard drive sa computer nga nag-record sa mga imahe sa CCTV. Kun di makit-an, mas molawom ang misteryo sa operasyon nga gipangulohan ni Laraga, nga nagsilbi niadtong kanhi hepe sa kapolisan sa Tacloban. Nga makapatumaw sa mas daghan pang huhungihong.
* * *
- Latest
