Brgy Sta Rosa, Lapu-Lapu City
“Hangyuon namo ang among mga opisyal sa barangay nga makigtambayayong sila sa MECO aron kabutangan og suga ang mga poste sa karsada gikan sa may police station hangtod na sa may tunga nga bahin kay ngiob kaayo ug kuyaw agian.”
Brgy Yati, Liloan, Cebu
“Mohangyo mi sa tagdumala sa San Roque School nga maghimo sila’g parkingan kay kini maoy hinungdan sa grabeng trapik diri sa among lugar.
Brgy Centro, Mandaue City
“Maayo unta og ayuhon na ang karsada paingon sa Ouano wharf kay grabe na gyud kadagko sa libaong. Lisod na agian ug pabayron pa ang tanang sakyanan nga mosulod paingon sa pantalan.”
Brgy Sangi, Toledo City
“Among ireklamo ang tigkuha sa basura diri kay tagsa na man lang kuhaon ang among mga basura. Asa na man diay ang garbage truck? Daghan na kaayong nagtipun-og nga basura diri.”
Brgy Suba, Danao City
“Padayon mi nga nag-antos sa suplay namo sa tubig diri nga way agas-agas. Mas gisiguro man gud nila og taud sa linya sa tubig kadtong mga dagkong balay.”
Brgy Tabunok, Talisay City
“Grabeha sa trapik diha atubangan sa simbahan, kada adlaw gyud tungod sa paugatay sa mga driver, unya ang mga mag-motor, dumbolan usahay ang mga tawo nga maglakaw daplin sa karsada. Ang mga traffic enforcer magsiga lang ang mata.”
Brgy Buhing-Tubig, Pinamungajan, Cebu
“Hangtod karon wala pa matuman sa mga opisyal sa barangay ang ilang saad nga patauran nila og suga ang mga poste.”
Brgy Lutac, City Of Naga
“Dunay hanging bridge sa dakong sapa diri paingon sa tapon sa Sityo Cadajoan apan naguba na ang giali sa kilid kay nangaputol na ang ubang puthaw. Maayo unta’g aksyonan dayon kini kay kuyaw sa molatay diha, labi na mga estudyante.“
Brgy Pulangbato, Cebu City
“Bag-o lang nahuman pagsemento ang karsada diri apan nangabuak sab dayon kay wala pa gani mauga pag-ayo, gipaagian na man dayon og mga dumptrucks.”
Brgy Lawa-An, Talisay City
“Unsay among buhaton sir aning among silingan kay ang ilang linya sa kuryente naa mag-agi sa atop sa among CR ug kuyawan mi kay sige ra ba og bag-id, basin makuryentihan unya mi. Gireklamo na ni namo sa VECO pero wala gyud atimana.”
Brgy Guadalupe, Cebu City
“Dunay shop diri sa Singson-Kanaas nga nakahasol kaayo namo. Grabi ang baho sa pintal nga ilang gigamit, gipang-ubo ug gi-sinusitis na intawon mi diri sa sige’g hanggap sa baho sa pintal.”
Brgy San Jose, Borbon, Cebu
“Ireklamo namo ning multicab sa barangay nga gimaneho sa usa ka tanod kay kun mosakay mi, iya mi nga papletehon. Unya kun naay emergency dili magamit ang multicab kay gipamasaheroan sa drayber. Usahay gamiton niya sa personal, ilabi na kun naay mga fiesta.”
Alang sa inyong mga reklamo text lang sa 09062973166
- Latest
