Anak nga wa suportahi sa amahan

Dear Atty. Divine,

Duna ko’y anak, ang iyang amahan kay half Japanese, half Filipino ug tua siya sa Japan nag-work. Pagbuntis nako, misuporta pa siya pero sa pagpanganak na nako, wa na’y klaro ang iyang pagpadala namo ug karon iya na kami nga gi-block ug wa nag-reach out namo ug wa na misuporta sa akong anak. Unsa nga case ang akong ma-file niya attorney? Dili kami kasal niya apan ang iyang name anaa sa birth certificate as father sa among anak. Puwede ba ako maka-file niya og kaso? — Marisa

Dear Marisa,

Kun gi-acknowledge niya ang bata pinaagi sa pagpirma sa Birth Certificate sa inyong anak, then obligado siya nga mosuporta sa bata kun unsay mga panginahanglan niini. Ang atong balaod wa magtakda kun pila gyud ang angay nga ihatag matag buwan sa amahan ngadto sa iyang anak kay kini magdepende man sa panginahanglan sa bata ug sa kapasidad sa amahan. Ang maayo nimong buhaton kun aduna kay kumpleto nga address sa amahan sa imong anak, padad-an nimo siya og demand letter ug kun iyang ibalewala ang imong demand letter then mahimo ka nga modangop sa korte alang sa pagpangayo og suporta. Mahimo sab nga  pasakaan nimo siya og kaso nga kalapasan sa balaod sa Anti-Violence Against Women and their Children gumikan sa iyang pagdumili pagsuporta sa bata. Apan ang problema lang kun atua siya sa Japan ug dili niya madawat ang summon sa korte, then dili makapadayon ang imong kaso. Mas maayo nga imong itayming ang pag-file kaniya og kaso kun anaa siya sa Pilipinas. – Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.